Aqmolalyqtar jańa páterlerdiń sýyqtyǵy men qabyrǵalarynyń kógerip jatqanyna shaǵymdandy

KÓKShETAÝ. KAZINFORM — Sheneýnikter aýa-raıy jylyǵan kezde merdiger barlyq jóndeý jumystaryn kepildik boıynsha júrgizetinine ýáde berdi.

Derjavınsk qalasynyń Molodejnyı yqshamaýdanyndaǵy № 9 úıdiń turǵyndary áleýmettik jelide ózderiniń máselelerin jazyp, beınejazba jarııalady.

Turǵyndardyń aıtýynsha, kópqabatty úı ótken jyly paıdalanýǵa berilgen. 

— Biz óz baspanamyzdyń baryna qýanyshtymyz, alaıda munda kelgeli kóp problemaǵa tap boldyq. Jańa úı qaǵaz júzinde ádemi, al shyn máninde qabyrǵalary jarylǵan, jylý birde bar, birde joq, barlyq qabyrǵalar men tóbeler kógergen, balkondardyń da sapasy syn kótermeıdi. Páterler sýyq jáne ylǵaldy. Kireberistegi baspaldaq shuryq tesik, tóbeler qulap tur, jergilikti ákimdik ázirge únsiz otyr, — deıdi turǵyndar.

Páter ıeleri barlyq zańbuzýshylyq tolyǵymen retke kelgenshe, ýaqytsha baspana berýdi surady.

Jarqaıyń aýdany ákimdigi bul másele boıynsha qurylys, sáýlet jáne qala qurylysy bóliminiń ókili Sergeı Makrdýmıan men merdiger «Mega Stroı Grýpp» JShS dırektory Temirlan Serikovtiń turǵyndarymen kezdesý ótkizgenin túsindirdi. Sondaı-aq olar páterlerdi aralap shyqqan.

— Jańa kópqabatty turǵyn úıde 80 páter bar. Tekserý barysynda jóndeý jumystaryn júrgizýdi talap etetin besinshi qabatta ornalasqan buryshtaǵy 9 páter anyqtaldy. Kórsetilgen kemshilikter tirkeldi. Qolaıly aýa raıy bolǵan kezde merdiger kepildik boıynsha jóndeý jumystaryn júrgizedi, — dep habarlady ákimdik.

Bul máseleni Jarqaıyń aýdandyq qurylys, sáýlet jáne qala qurylysy bólimi baqylaıtyn bolady.

Osyǵan deıin Rıdder turǵyndary da úıleriniń salqyndap ketkenine shaǵymdandy.