Aqmola oblysynyń turǵyndary Mysyrǵa joldama satyp alyp, 15 mln teńgeden aıyryldy
KÓKShETAÝ. KAZINFORM — Aqmola oblysynyń 5 turǵyny polıtsııaǵa kelip, shetelde demalýǵa joldama satyp alǵan týroperatorǵa shaǵymdandy.
Aqmola oblystyq polıtsııa departamenti týrıstik agenttiktiń qyzmetimen baılanysty alaıaqtyq isti anyqtady. Týroperatordyń aılasyna birneshe oblys turǵyny túsip, shyǵyn shamamen 15 mln teńge boldy.
— 2025 jyldyń naýryzynda polıtsııaǵa 52 jastaǵy jergilikti turǵyn shaǵymdandy. Er adam 2025 jyldyń qańtarynda belgisiz bir qyz onyń 7 mıllıon teńgege jýyq aqshasyn aldaý arqyly ıemdengenin habarlady. Polıtsııa teksergendeı, zardap shekken azamat týrıstik agenttik arqyly Mysyrǵa joldama alǵan. Shetelge ushamyn degenshe, turaqty túrde baılanys bolǵandyqtan, olardyń týragenttikke esh kúdigi bolmaǵan. Alaıda qonaqúıge kelgende týrısterge bólmelerdiń brondalmaǵany habarlanǵan, — delingen aqparatta.
Týrıstik agenttikpen baılanys ornatqan soń, demalýshylar «tehnıkalyq qate» týraly túsinikteme alǵan. Áıel qosymsha tólem jasaýdy surap, keıin aqshany qaıtaratynyna ýáde bergen. Elge oralǵannan keıin ýáde etilgen qarajatty zardap shekkender ala almady.
Keıin polıtsııaǵa taǵy tórt azamattan osy oqıǵaǵa uqsas ótinishter túsken.
— Alaıaqtyq faktisi boıynsha sot aldyndaǵy tergeý bastaldy. Jedel-izdestirý sharalary barysynda polıtsııa qyzmetkerleri kúdiktini anyqtady. Ol 41 jastaǵy jergilikti turǵyn bolyp shyqty. Qazirgi ýaqytta oǵan úıqamaq túrindegi qamaý sharasy qoldanylǵan, — dep málimdedi polıtsııa departamentiniń baspasóz qyzmeti.
Quqyq qorǵaý organdary azamattardy týrıstik joldamalardy satyp alý kezinde abaı bolýǵa jáne tek senimdi ári resmı tirkelgen týrıstik agenttikterdiń qyzmetine júginýge shaqyrdy.
Buǵan deıin SQO-da ınternet alaıaqtardyń jańa tásilinen 13 adam zardap shekkeni týraly jazǵan bolatynbyz.
