Aqmola oblysynyń iri aýyl sharýashylyǵy kásiporyndary «Oqjetpeske» qoldaý kórsetedi
ASTANA. KAZINFORM - Aqmola oblysynda iri aýyl sharýashylyǵy kásiporyndary «Oqjetpes» fýtbol klýbyna qarjylaı qoldaý kórsetedi. Bul jóninde Aqmola oblystyq ákimdigi málim etti.
Oblys ákimi Marat Ahmetjanovtyń tóraǵalyǵymen ákimdikte «Oqjetpes» fýtbol klýbynyń qyzmetine qatysty jumys keńesi ótti. Onda iri aýyl sharýashylyǵy kásiporyndarynyń ókilderi kásibı sportty damytýǵa bıznestiń júıeli qatysý modelin qalyptastyrý máselelerin talqylady.
Qazaqstan Prezıdentiniń kásibı sportty kezeń-kezeńimen kommertsııalandyrý jáne klýbtardyń bıýdjet qarjylandyrýyna táýeldiligin azaıtý jónindegi tapsyrmasyn iske asyrý aıasynda klýbty neǵurlym turaqty qarjylyq modelge kóshirý máselesi qaraldy.
Qorytyndy boıynsha «Oqjetpes» fýtbol klýby qoǵamdyq qoryn qurý jóninde sheshim qabyldandy. Qordyń quryltaıshysy - Qazaqstannyń Eńbek Eri ataǵynyń ıegeri, «Agrofırma «Rodına» JShS dırektory Ivan Adamovıch Saýer. Ol óńirdiń aýyl sharýashylyǵy taýaryn óndirýshilerimen birlesip, aqmolalyq fýtbolǵa júıeli qoldaý kórsetedi. Osylaısha «Oqjetpes» fýtbol klýby óńirlik bıznestiń qatysýymen jańa basqarý modeline kóshedi. Al oblysta kásibı sportty bıýdjetten tys qarjylandyrýdyń júıeli tetigi qalyptasady.
Eske salsaq, budan buryn «Ordabasy» fýtbol klýby jeke basqarýǵa ótken komandalar qataryna qosyldy.
Aıta ketsek, qazirge deıin budan buryn elimizde «Qaısar», «Jeńis», «Shahter», «Qyzyljar», «Aqtóbe» klýbtary jekemenshikke ótti.