Aqmola oblysynyń pedagogi Prezıdenttiń qolynan «Eren eńbegi úshin» medalin aldy

KÓKShETAÝ. KAZINFORM — Aqmola oblysy Ereımentaý qalasyndaǵy Nasyr Smaǵulov atyndaǵy mektep-lıtseıdiń bıologııa jáne hımııa pániniń muǵalimi Oksana Zabııakına «Eren eńbegi úshin» medalimen marapattaldy. Marapatty pedagog Memleket basshysynyń qolynan aldy, dep habarlaıdy Kazinform tilshisi. 

Oksana Zabııakına Aqmola oblysy Eńbekshilder aýdanynyń (qazirgi Birjan sal aýdany) Ýálıhanov aýylynda dúnıege kelgen. 2005 jyly bıologııa jáne hımııa mamandyǵy boıynsha ýnıversıtetti úzdik bitirgen. Eńbek jolyn Ereımentaý qalasyndaǵy Nasyr Smaǵulov atyndaǵy mektep-lıtseıde bıologııa jáne hımııa pániniń muǵalimi bolyp bastap, osy kúnge deıin sonda qyzmet etip keledi.

— Meniń otbasymda barlaǵa pedagog. Anam aǵylshyn tili pániniń muǵalimi bolyp, mektepte 40 jylǵa jýyq eńbek etti. Ol — bilim berý salasynyń úzdigi. Sondyqtan bala kúnimnen súıikti oıynym mekteppen baılanysty boldy. Bul meniń mamandyq tańdaýyma áser etti dep oılaımyn, — deıdi ustaz.

Oksana Sergeevna jaratylystaný-matematıkalyq baǵyttaǵy pánderdi aǵylshyn tilinde oqytý baǵdarlamasyn alǵashqylardyń biri bolyp júzege asyrǵan pedagogtardyń qatarynda. Qazirgi ýaqytta ol bıologııa men hımııa pánderi boıynsha aǵylshyn tilinde birneshe oqý quraldarynyń avtory. Atap aıtqanda, 6-synypqa arnalǵan «Botany in English», 7-synypqa arnalǵan «Biology in English», 8–9 synyptarǵa arnalǵan «Chemistry in English» atty jumys dápterleri men 8–11 synyptarǵa arnalǵan bıologııanyń bazalyq kýrsy boıynsha dıdaktıkalyq materıaldar jınaǵyn ázirlegen. Sondaı-aq, «Bıologııa jáne hımııa sabaqtarynda STEAM tásilderin qoldaný» taqyrybynda shyǵarmashylyq jáne zertteý jumysyn júrgizedi.

«Bıologııa men hımııany aǵylshyn tilinde oqytý júıesin» qalyptastyrý jónindegi tájirıbesi respýblıka muǵalimderiniń úzdik pedagogıkalyq tájirıbeler bankine engizilgen.

— Mektep pen ýnıversıtette aǵylshyn tili jaqsy deńgeıde boldy. Onyń ústine anam aǵylshyn tiliniń muǵalimi bolǵandyqtan, tilge qyzyǵýshylyǵym erte qalyptasty. 2016 jyldan bastap bıologııa men hımııany aǵylshyn tilinde oqytýdy kezeń-kezeńimen engize bastadym. Alǵashynda fakýltatıv túrinde ótse, keıinnen tolyqqandy sabaq júıesine aınaldy. Bul júıe ámbebap bolyp shyqty jáne meniń tájirıbem respýblıkalyq oqý-ádistemelik keńeste jınaqtalyp, maquldandy, — dedi pedagog.

Oksana Sergeevnanyń ustazdyq qyzmetindegi basty erekshelik ózin-ózi jetildirýge, jańa izdenisterge umtylýy. Ol únemi kásibı baıqaýlar men olımpıadalarǵa qatysyp, júldeli oryndarǵa ıe bolyp keledi. Onyń shákirtteri de túrli deńgeıdegi baıqaýlar men pándik olımpıadalardyń jeńimpazdary atanyp keledi.

Oqýshylardyń aıtýynsha, pánderdi aǵylshyn tilinde oqý olardyń qyzyǵýshylyǵyn arttyryp, tildi meńgerýge qosymsha múmkindik beredi.

— Kóptegen balanyń otbasynda «hımııa men bıologııa qıyn pán» degen qorqynysh qalyptasqan. Al men alǵashqy sabaqtardan bastap osy psıhologııalyq kedergini joıýǵa tyrysamyn. Oqýshylar sabaq kezinde jymıyp, pánniń qyzyqty ekenin túsingen sátte qorqynysh seıilip, bilim alýǵa degen ynta artady, — deıdi ustaz.

Prezıdenttiń marapaty Oksana Sergeevna úshin kútpegen jańalyq bolǵan. Bir kúni keshke oǵan qońyraý shalyp, memlekettik nagradaǵa usynylǵanyn jáne Astanaǵa kelýi qajet ekenin habarlaǵan.

— Tolyqqandy eshteńe aıtpady. Al marapatty Memleket basshysynyń ózi tabystaıtynyn bilgen sátten-aq qatty tolqydym. Bul senim, eńbegińniń joǵary deńgeıde baǵalanýy. Endi sol senimge laıyq bolý úshin odan ári eńbek etý kerek, — dedi ol.

Ustaz kóptegen túlek tárbıelep shyǵardy. Búginde olardyń arasynda dárigerler, iri kompanııalardyń zerthanashylary, bıotehnologtar, farmatsevter, munaı-gaz salasynyń mamandary bar. Olar Qazaqstanda ǵana emes, shetelde de tabysty eńbek etip júr.

— Ustazdar kúni qarsańynda barsha áriptesimdi merekemen quttyqtaımyn! Denderińizge saýlyq, otbasylaryńyzǵa amandyq, jańa shyǵarmashylyq tabys pen shabyt tileımin. Eń bastysy shákirtterimizdiń bilimge degen qushtarlyǵy sónbesin, — dep jyly lebizin bildirdi pedagog.

Buǵan deıin matematıka páni muǵalimi Aıan Sábıtov týraly jazǵan edik.