Aqmola oblysynyń orman mekemelerine órtke qarsy jańa tehnıka tabystaldy
ASTANA. KAZINFORM – 2026 jylǵy 4 sáýirde Ekologııa jáne tabıǵı resýrstar vıtse-mınıstri N.Shárbıev pen Aqmola oblysy ákiminiń orynbasary A.Amrenova oblystaǵy orman mekemelerine 13 birlik órtke qarsy jańa tehnıkany tabystady. Bul týraly Ekologııa jáne tabıǵı resýrstar mınıstrligi habarlady.
Órt sóndirý avtokóligi – otandyq óndiris ónimi, orman órtterin sóndirýge tikeleı qatysatyn orman sharýashylyǵy mamandarynyń usynystary eskerile otyryp ázirlengen.
Manevrligin arttyrý úshin tsısterna kólemi 3 tonnany quraıdy, joǵary ótimdiligi qamtamasyz etilgen, ózin-ózi sóndirý júıesi bar jáne qozǵalys barysynda órt sóndirý múmkindigi qarastyrylǵan.
Aýmaqqa barlyǵy 24 órt sóndirý avtokóligin jetkizý josparlanyp otyr.
2025 jyly 30 traktor jáne 31 kishi orman patrýldik kesheni jetkizildi.
2011–2023 jyldar aralyǵynda orman jáne tabıǵatty qorǵaý mekemeleriniń materıaldyq-tehnıkalyq bazasy is júzinde jańartylmaǵan.
2024–2025 jyldary respýblıkalyq jáne jergilikti bıýdjetten 21,5 mlrd teńge bólinip, onyń esebinen 92 órt sóndirý avtokóligi, 118 kishi orman patrýldik kesheni (KOPK), 244 traktor, 240 patrýldik avtokólik jáne 3 myńnan astam ózge tehnıka men jabdyq satyp alyndy.
Sonymen qatar lızıngtik qarajat esebinen 1057 birlik órtke qarsy tehnıkany satyp alýǵa 35 mlrd teńge bólindi. Onyń ishinde 333 órt sóndirý avtokóligi, 350 traktor jáne 374 kishi orman patrýldik kesheni bar.
Respýblıka boıynsha traktorlar men kishi orman órt sóndirý keshenderin jetkizý tolyq aıaqtaldy, sondaı-aq 152 órt sóndirý avtokóligi jetkizildi.
2026 jyldyń mamyr aıynyń sońyna deıin taǵy 168 órt sóndirý avtokóligin jetkizý kútilýde.
Qabyldanyp jatqan sharalar eldiń órt qaýpi joǵary óńirlerindegi memlekettik orman ıelerin órtke qarsy tehnıkamen jańartý jáne jabdyqtaýdy kózdeıdi.
Eske sala keteıik, buǵan deıin ormanshylarǵa haı-tek stılinde jańa úıler salynatynyn habarlaǵan edik.
