Aqmola oblysynyń oqýshylary esirtkige qarsy mýltfılm ázirledi
ASTANA. KAZINFORM — Aqmola oblysyndaǵy № 11 mektep-gımnazııasynyń oqýshylary esirtkige qarsy kúres taqyrybynda «Vırtýaldy tańdaý — shynaıy ómir» mýltfılmin jasap shyqty.
Kókshetaýdaǵy № 11 mektep-gımnazııasynyń shyǵarmashylyq toby «Vırtýaldy tańdaý — shynaıy ómir» jobasyn 8B áskerı-sporttyq synyp oqýshysy Erkebulan Mırlan Zýhrabulynyń qatysýymen júzege asyrǵan. Joba jetekshileri — ınformatıka páni muǵalimi Ásemgúl Súndetova, qazaq tili jáne ádebıeti páni muǵalimi Aınur Amangeldınova, tarıh páni muǵalimi Nurjan Eshimbaı, jalpy jetekshi Saǵyntaı Májenov.
Bilim berý uıymynyń shyǵarmashylyq toby eki jyl boıy jasóspirimder arasynda zııandy ádetterdiń aldyn alý tásilderin zerttep, mýltfılm men VR-kvest oıynyn qurastyrypty.
— Biz JI-di áleýmettik máselelerde qalaı qoldanýǵa bolatynyn oılastyrdyq. Sóıtip «Tańdaý sende» kvesti men nashaqorlyqqa qarsy shaǵyn mýltfılm jasadyq. Qazir topta 12 adam jumys isteıdi, - deıdi joba jetekshileriniń biri.
Bul mýltfılm men kvestiń negizgi ózegi — jasóspirimderdiń sanaly tańdaý jasaýyna yqpal etý. Eki keıipker Saıa men Aıbek arqyly oqýshy qaýym ómirdegi túrli joldardyń saldaryn sezine alady.
— Kvest oıynynda ár adam óz tańdaýyn jasaıdy, al biz VR arqyly onyń saldaryn kórsetemiz. Aıbektiń basynan ótetin oqıǵa nashaqorlyqqa ákeletin qaýipterdi anyq kórsetedi, - deıdi avtorlar.
Joba komandasy bolashaqta mýltfılmniń jańa bólimderin jasap, kvest oıynyn App Store-ǵa júkteýdi josparlap otyr. Ózderiniń aıtýynsha, vırtýaldy format jasóspirimderge eń qyzyqty ári áserli profılaktıka quralyna aınalǵan.
Aıta keteıik, bıyl jumyssyzdar VR-tehnologııalary negizinde oqytylatynyn jazǵan edik.