Aqmola oblysynyń mektepterinde oblys ákimi Marat Ahmetjanovtyń qatysýymen ashyq sabaq ótti
ASTANA. KAZINFORM - Búgin Aqmola oblysynyń 11-synyp túlekteri úshin erekshe synyp saǵaty uıymdastyryldy. Otan qorǵaýshylar kúnine arnalǵan ashyq sabaq Kókshetaý qalasyndaǵy M.Ǵabdýllın atyndaǵy №3 mektep-gımnazııasynda ótti.
Іs-sharaǵa Aqmola oblysynyń ákimi Marat Ahmetjanov arnaıy qatysyp, jas túlektermen erkin suhbat qurdy.
Sabaq «Urpaqtar sabaqtastyǵy: tarıhymyzdy saqtaý arqyly Otandy qorǵaý» taqyrybynda ótti.
Joǵary synyp oqýshylary oblys basshysyna ózderin tolǵandyrǵan saýaldaryn qoıyp, naqty ári mazmundy jaýap aldy.
Óz sózinde Marat Ahmetjanov óńirdiń damý barysy, el tarıhyndaǵy kórnekti tulǵalar men olardyń elge qosqan úlesi týraly aıtyp ótti. Ol adal eńbek pen bilimge umtylýdyń mańyzdylyǵyn tilge tıek etip, Memleket basshysy jastardyń el bolashaǵyndaǵy róline erekshe nazar aýdaratynyn eske saldy.
«Jastar – elimizdiń erteńi. Olardyń jan-jaqty damýyna memleket tarapynan barlyq jaǵdaı jasalyp jatyr. Aqmola oblysynda zamanaýı mektepter men biregeı sport keshenderi salynýda. Túlekterge arnalǵan bilim granttary qarastyrylǵan. Eń bastysy – adal eńbek etip, únemi izdeniste bolý qajet», – dedi oblys ákimi.
Sonymen qatar, óńir basshysy ákim granty men stıpendııasyn alý múmkindigi, sondaı-aq jas mamandardy qoldaý sharalary týraly da aıtyp ótti.
Aıta keteıik, jyl saıyn ákimdik tarapynan joǵarǵy jáne joǵary oqý ornynan keıingi bilim alatyn 100 pedagog jáne 85 medıtsına mamanyn daıarlaýǵa memlekettik bilim berý tapsyrysy aıasynda qarjy bólinedi. «Dıplommen aýylǵa» baǵdarlamasy arqyly jas mamandarǵa kóterme járdemaqy men turǵyn úı alýǵa arnalǵan jeńildetilgen nesıe beriledi. Al asa tapshy medıtsınalyq mamandyqtar boıynsha 8,5 mln teńgege deıin kóterme járdemaqy qarastyrylǵan.
Ashyq sabaqqa óńirdiń barlyq túlekteri qosyldy.
- M.Ǵabdýllın atyndaǵy mektep-gımnazııasynyń 11-synyp oqýshysy Dına Smaılova kezdesýden alǵan áseri týraly aıtty: «Oblys ákimi Marat Ahmetjanovpen ótken suhbat men úshin erekshe áserli boldy. Jańa oılar paıda bolyp, bolashaqqa degen kózqarasym keńeıe tústi. Men bolashaqta aǵylshyn tili pániniń muǵalimi bolýdy armandaımyn. Bilim men qoǵam damýyna óz úlesimdi qosýdy qalaımyn. Qazirgi tańda bul mamandyqtyń mańyzy zor dep oılaımyn, óıtkeni elimiz qarqyndy damyp keledi», – dedi ol.
Aıta ketý kerek, bıylǵy oqý jylynda Aqmola oblysyndaǵy 536 mektepte 1-den 11-synypqa deıingi aralyqta 139 811 oqýshy bilim alýda. Onyń ishinde 6 070 – 11-synyp túlekteri, olar úshin mundaı kezdesýler kásibı baǵyt-baǵdar alýǵa zor septigin tıgizeri sózsiz.
