Aqmola oblysynyń fermerleri dızel otynynyń sapasyna shaǵymdandy

ASTANA. KAZINFORM — Aqmolalyq sheneýnikter fermerlerdiń dızel otynynyń sapasyna qatysty shaǵymdaryna jaýap berdi, dep habarlaıdy Kazinform agenttiginiń tilshisi.

Sheneýnikterdiń aıtýynsha, dızel otynynyń qatýy qyrkúıek aıynyń sońynda aýa raıynyń kúrt sýytýynan bolǵan. Degenmen, oblystyq aýyl sharýashylyǵy basqarmasy aldaǵy kúnderi aýa raıynyń jylynýyna úmit artyp otyr.

Qostanaı oblysyndaǵy fermerlerden keıin Aqmola oblysynyń dıqandary da egin jınaý naýqanyna bólingen dızel otynynyń sapasyna shaǵymdandy. Aıtýlarynsha, otyn soltústik óńirlerde jumys isteýge jaramsyz bolyp shyqqan. Temperatýra azdap tómendegenniń ózinde dızel parafınge aınalyp, tehnıkanyń júrisin tejeıdi.

Qalyptasqan jaǵdaıǵa qatysty Aqmola oblysynyń aýyl sharýashylyǵy jáne jer qatynastary basqarmasy pikir bildirdi.

— Kenetten bolǵan sýyqqa baılanysty arzandatylǵan dızel otynynyń sapasyna qatysty alańdaýshylyqty túsinemiz. Rasynda da, qyrkúıek aıynyń sońyndaǵy mundaı kúrt mınýs temperatýra — óte sırek ári anomaldy qubylys. Ádette, Aqmola oblysynda turaqty úsik qazan aıynyń sońyna qaraı bastalady, ol kezde fermerler egin jınaý naýqany aıaqtap úlgeredi. Qazirgi tańda oblys fermerleri egis alqaptarynyń shamamen 80 paıyzyn jınap úlgerdi. Sınoptıkterdiń boljamyna sáıkes, aldaǵy kúnderi aýa raıy jylynady dep kútilip otyr. Bul jaǵdaı dala jumystaryn aıaqtaý úshin qolaıly bolady jáne kelesi 2–3 apta ishinde egin jınaý tolyq aıaqtalady, — dep habarlady vedomstvodan.

Aıta keteıik, buǵan deıin Energetıka mınıstri Erlan Aqkenjenov kúzgi dala jumystaryna daıyndyq sheńberinde aýyl sharýashylyǵy taýaryn óndirýshilerdi dızel otynymen qamtamasyz etý sharalary týraly aıtyp berdi.