Aqmola oblysynyń Esil aýdanynda 21 turǵyn úı salynýda

ASTANA. KAZINFORM - QR Ónerkásip jáne qurylys mınıstrligi sý tasqynynan zardap shekkenderdiń baspanasyn qalpyna keltirý sharalaryn jalǵastyrýda.

Esil aýdanyndaǵy Esil qalasynda zardap shekken 21 otbasyǵa jańa úıler salynýda. Qurylys barysyn gov.kz portaly arqyly onlaın baqylaýǵa bolady.

«Sondaı-aq 189 úıde jóndeý jumystary jalǵasyp jatyr, 13 otbasyǵa turǵyn úı satyp alynyp, aldaǵy ýaqytta taǵy 3 otbasyǵa úıdiń kiltteri tabystalady. Qurylys-jóndeý jumystarynyń boljamdy aıaqtalý merzimi jazdyń sońyna deıin», — dep jazdy mınıstrlikten.

QR Ónerkásip jáne qurylys mınıstrligi Ahýaldyq ortalyǵynyń málimeti boıynsha Aqmola oblysynda barlyǵy 1 265 nysanǵa tehnıkalyq tekserý júrgizilip, onyń nátıjeleri boıynsha kelesi sharalar josparlanǵan:

— 331 turǵyn úı qurylysy — 273-i bastaldy;

— 220 turǵyn úı satyp alý — 192 úı satyp alyndy;

— 714 turǵyn úıde jóndeý jumystaryn júrgizý.