Aqmola oblysynyń eginshileri kúzgi astyq jınaý naýqanyna kiristi

KÓKShETAÝ. KAZINFORM — Aqmola oblysynyń eginshileri kúzgi astyq jınaýǵa kiristi. Oraq jumystaryn bıyl 5,4 mln gektar alqapta júrgizý josparlanǵan. Bul týraly oblys basshysy Marat Ahmetjanovtyń tóraǵalyǵymen ótken agrokeńeste aıtyldy.

Jıynda aýyl sharýashylyǵy kásiporyndarynyń naýqanǵa daıyndyǵy jáne mol astyqty jaýyn-shashynǵa tıgizbeı, ýaqtyly jáne sapaly jınaý máseleleri talqylandy.

Oblys basshysy Marat Ahmetjanov búgingi tańda eń mańyzdy mindet egin jınaýdy tıisti deńgeıde júrgizý ekenin, oǵan oblys pen jalpy el halqynyń azyq-túlik qaýipsizdigi men ál-aýqaty tikeleı baılanysty ekenin atap ótti.

«Egin oraǵy — respýblıka boıynsha tıisti resýrstardy talap etetin eń iri ári eń mańyzdy naýqan. Barshamyz eginniń sapasy men kólemine áser etýi múmkin kez kelgen kidirister men máselelerdi boldyrmaý úshin bar kúsh-jigerimizdi salýymyz kerek», — dedi óńir basshysy.

Oblys ákiminiń orynbasary Murat Balpannyń aıtýynsha, osy jyly oblys boıynsha barlyǵy 4,7 mln gektar alqapta dándi jáne dándi burshaq daqyldaryn jınaý josparlanǵan.

Sonymen birge, 268,6 myń maıly daqyl, 421 myń gektarda jemshóp bar.

«Naýqanǵa barlyǵy 8,9 myń astyq jınaıtyn kombaın, 2,6 myń shalǵy jáne 4,8 myń júk avtokólikteri jumyldarylady. Al astyqty jalpy syıymdylyǵy 4,3 mln tonna bolatyn 65 lıtsenzııalanǵan astyq qabyldaý kásiporny qabyldaıdy. Buǵan qosa, aýyl sharýashylyǵy taýarlaryn óndirýshilerdiń menshiginde 2,8 mln tonna astyq qoımalary bar. Egin jınaý jumysyn júrgizýge 83 myń tonna dızel otynynyń kepildendirilgen kólemi bólindi», — dedi ol.

Sonymen birge, jıyn barysynda «A.Baraev atyndaǵy astyq sharýashylyǵy ǴÓO» JShS basqarma tóraǵasynyń orynbasary ıÝrıı Dolınnyı, «Agrofırma Rodına» JShS dırektory Ivan Saýer jáne «LOGOS GREIN» JShS bas dırektory Arman Qudaıbergenov, «Agrofırma» TNK» JShS bas agronomy Grıgorıı Sedov, «Qazgıdromet» RMK Aqmola fılıalynyń dırektory Baqyt Maqajanova óz oı-pikirin bólisti.

Aıta ketsek, budan buryn Aqmola oblysynda mal dárigerlerine sý jańa 19 avtokóliktiń kilti tabys etilgenin jazǵan edik.