Aqmola oblysynyń bir aýdanynda sý tasqynynyń beti qaıta bastady
PETROPAVL. KAZINFORM — Aqmola oblysynda sý tasqyny zardabyn azaıtý úshin oblystyq mańyzy bar joldy ashyp, sýdy aǵyzýǵa týra keldi.
Osylaısha Makınsk qalasyna kelgen mol sý qaýipsiz jaqqa aǵyzyldy.
Aqmola oblysy Tótenshe jaǵdaılar departamentiniń habarlaýynsha, Bulandy aýdanynda sý tasqynynyń beti qaıtty, alaıda onyń saldarymen kúres táýlik boıy júrgizilip jatyr.
— Makınsk qalasynda jedel shtab quryldy, oǵan Kókshetaý, Atbasar, Astana jáne Qaraǵandy oblystarynan TJM qyzmetkerleri men tehnıkasy tartyldy. Kómekke kelgender qaptardy qummen toltyryp, sý jolyna tósedi. Sondaı-aq arnaıy tehnıkamen sý sorǵyzý jumysy júrgizilip jatyr. Aýdan ortalyǵyn kelgen tasqyn sýdan saqtaý úshin oblystyq mańyzy bar avtojol buzylyp, sý joly jasaldy, — deıdi Aqmola oblysy TJD resmı ókili Ersaıyn Qoıshybaev.
Makınskiden basqa birneshe eldi mekende — Kapıtonovka, Jýravlevka, Novobratskoe, Ivankovka, Novonıkolskoe, Karaoz, Pýshkıno jáne Kýpchanovka eldi mekenderinde de qutqarý jumystary júrgizildi. Bul aýyldarǵa aldyn ala azyq-túlik pen dári-dármek jetkizildi.
Sý tasqyny kezinde aýdanda barlyǵy 3 mln tekshe metrden astam sý sorylyp, 25 myńǵa jýyq qum salynǵan qap jáne 4,5 myń tonnaǵa jýyq ınertti materıal tóseldi.
— Qazirgi ýaqytta tranzıttik rejımde tasqyn sý ótkizilip jatyr, aldyn alý is-sharalary jalǵasady, — deıdi qutqarýshylar.
Buǵan deıin Aqmolanyń Staryı Kolýton aýylynda kólik qatynasy úzilgenin jazǵan edik.