Aqmola oblysynyń Arshaly aýdanyndaǵy mektepte at sporty úıirmesi bar
ASTANA. KAZINFORM - Jylqy minezdi qazaq báıge alatyn tulpardy birden tanyp, sáıgúlikke quryq salyp, miniske úıretken. Bul – erterekte halqymyzdyń kúndelikti tirshiligi bolsa, búginde naǵyz ónerge aınaldy.
Asaý úıretýdi oıyn balalary úlkenderden estigeni bolmasa, kózben kórgenderi sırek. Al Aqmola oblysynyń Arshaly aýdanyndaǵy J.Táshenov atyndaǵy mekteptiń 9-shy synyp oqýshysy Erasyl Amanǵalı atty miniske úıretýdiń sheberi dese bolady.
Erasyl 13 jasynan beri ákesiniń janynda júrip, at baptaýdyń qyr-syryn meńgergen. On beske endi tolǵan jas óren úıirden kez-kelgen taıdy quryqtap, miniske úırete alady. Tipti, talaı márte taı jarystarda qanjyǵasy da «maılanǵan».
«Asaý úıretý qanymyzda bar qasıet, jylqynyń janynda júrip, energııa alamyn. Múshelge tolǵan jasymda ákem úıge eki baıtal ákeldi. Baıtaldyń jabaǵysy bar. Sol jabaǵysyn kórip, qatty qyzyqtym. Sosyn kókpar atyn ustaıtyn Nádirbek degen dosym bar edi. Ol meni ylǵı atqa minýge shaqyratyn. Men qorqatynmyn. Qashatynmyn odan»,-deıdi shabandoz.
Ol atqa minbek bolyp, talaı ret jaraqat alǵanyn da jasyrmaıdy.
«Kerisinshe, qulaǵan saıyn delebem qozyp, qunanǵa qamshy basqym kelip turady. Birde ertoqymǵa sekirip mingen kezde atym úıge qaraı shabamyn dep, aldyn kóterip, baǵynbaı turyp aldy. Taǵy bir sekirgen kezde basyndaǵy súıegi ernimdi jardy. Sol kúni úıde eshkim joq edi, bet-aýyzym qan-qan bolyp, jylqyny qoraǵa qamap tastadym da, kelesi kúni minip, «kegimdi» aldym, qamshylap tárbıege sallǵan kezder bolǵan»,-deıdi.
Jalpy Arshaly aýylynda 50-ge jýyq oqýshy at sportyna qyzyǵady. Eldi mekende at sporty túrinen úıirme de ashylǵan. Jastar aptasyna eki márte taza aýada atpen serýendep, boı jazýdy ádetke aınaldyrǵan.
«Balalardyń bos ýaqytynda úıde otyryp, kompıýterge, telefonǵa qaraǵannan góri, atqa minip, shygyqsyn dep, at sportyn damytýdy qolǵa aldyq. Atqa qumartpaıtyn qazaq joq shyǵar. Qazirgi tańda balalar osy sportty ásirese atty jaqsy kóredi. Aýdan basshylyǵy da bul bastamany qoldap otyr. Keler jyly shabandozdarǵa birkelki kıim tiktirip, jattyǵýǵa arnalǵan qural-jabdyqtardy alyp bermek»,-deıdi J.Táshenov atyndaǵy mekteptiń dene shynyqtyrý pániniń muǵalimi Amandyq Moldabaıuly.
Zulqarnaı Ermuratuly
