Aqmola oblysynyń ákimi óńirdegi astyqtyń rekordtyq ónimdiliginiń qupııasyn aıtty

ASTANA. KAZINFORM — Aqmola oblysynyń ákimi Marat Ahmetjanov Jibek Joly telearnasyndaǵy «Ýáde» baǵdarlamasyna bergen suhbatynda óńirdegi rekordtyq deńgeıdegi astyq shyǵymynyń qupııasyn aıtty.

— Eń aldymen aýa raıy áser etti. Osyndaı aýa raıyna baılanysty tıisti túsim alyp otyrmyz. Ókinishke qaraı, keıbir oblystarda qar da jaýdy. Ondaı jaıttar astyqty der kezinde jınaýǵa, onyń sapasyna kedergisin keltirdi. Búgingi tańda egis alqabynyń 80 paıyzy oryldy. Aqmola oblysyn otandyq aýyl sharýashylyǵynyń júregi dep aıtýǵa bolady. Óıtkeni eldegi eń úlken egis alqaby bizdiń óńirde. Bıyl biz 5,5 mln gektarǵa tuqym septik. Sonyń 80 paıyzyn oryp, 6 mln tonnadan astam astyq jınadyq. Ónimdilik gektaryna 16 tsentnerden aınaldy. Jınalǵan astyqtyń 75 paıyzdan astamy — 3-klass jáne odan joǵary surypty. Muny taýarly astyq deı alamyz. Qamyrǵa jaramdy astyqqa shetelde de suranys joǵary. Egin orý naýqanyn 1-2 aptanyń ishinde aıaqtaımyz degen josparymyz bar, — dedi ákim.

Sondaı-aq ol oblys dıqandaryna bıyl 118 mlrd teńge jeńildetilgen nesıe berilgenin atap ótti.

— Bul degenimiz — 1000 sharýa qojalyǵyna der kezinde kómek berildi degen sóz. Ýaqytyly berilgen kómektiń árqashan berekesi, nátıjesi bolady. Astyqtyń ýaqytyly jınalýy da qarajatqa baılanysty. Buryn da memleket tarapynan kómek bolyp turǵan. Biraq júıesiz, tıimsiz uıymdastyrylatyn. Kómektiń keshigip keletini egin naýqanynyń árbir kezeńine kedergi keltiredi. Bıyl tarıhta bolmaǵan qoldaý kórsetildi. Jańa aıtqan 118 mlrd teńgeniń bárin ýaqytynda aldyq. 47 mlrd teńgege 5 paıyzdyq lızıng arqyly tehnıkalarymyzdy jańarttyq. Bul 7 jyl merzimge, 2 jyl kanıkýlymen berildi. Al tyńaıtqyshqa ketetin shyǵynnyń 60 paıyzyn memleket tólep berdi. Sonyń arqasynda ótken jyldarǵa qaraǵanda tyńaıtqyshty 3 ese kóp septik. Jıyn-terin naýqany kezinde 94 myń tonna janarmaıdy jeńildetilgen baǵamen aldyq. Qazir naryqtaǵy 1 tonna janarmaıdyń baǵasy 300 myń teńge bolsa, biz sharýalarǵa 254 myń teńgeden berdik. Osynyń bárin ýaqytynda oryndadyq, — dedi Marat Ahmetjanov.

Eske salsa ketsek, buǵan deıin elimiz boıynsha 20,8 mln tonna astyq bastyrylǵanyn jazǵanbyz.