Aqmola oblysynyń ákimi Býrabaıdaǵy jerlerge qatysty taraǵan aqparatqa túsinikteme berdi

ASTANA. KAZINFORM – Óńir ákimi Marat Ahmetjanov Býrabaı aýdanynda turǵyndardan alynǵan jer telimderiniń ornyna kazıno salynady degen aqparatty joqqa shyǵardy.

Ákimniń aıtýynsha, qaıtarylyp jatqan ýchaskeleriniń barlyǵy tek zańsyz berilgen nemese maqsatsyz paıdalanylyp otyrǵan jerler.

Buǵan deıin BAQ-ta Býrabaı aýdanynda jer ýchaskeleriniń jappaı qaıtarylyp jatqany týraly habar taraǵan edi.

Prokýratýranyń málimetinshe, bul jer telimderiniń bir bóligi zańsyz berilgen. Alaıda jergilikti turǵyndar olardyń ornyna oıyn aımaqtary salynady dep qaýiptengen.

– Bul shyndyqqa saı kelmeıtin aqparat. Eshkim kazıno nemese ózge oıyn aımaǵyn salý úshin jer almaıdy. Mundaı aımaqtar Úkimettiń jáne jergilikti atqarýshy organdardyń qaýlysymen burynnan anyqtalǵan. Al jer ýchaskelerin qaıtarýǵa kelsek, birneshe jyl buryn oblys ákimi men máslıhattyń qaýlysy arqyly ulttyq parktiń jerleri óz quzyretinen tys shyǵarylyp, jergilikti atqarýshy organnyń menshigine berilgen. Bul – zańbuzýshylyq edi. Oblys prokýrorynyń narazylyǵyn men, oblys ákimi retinde, qanaǵattandyrdym. ıAǵnı, bul jaǵdaıda zań buzǵan tarap oblystyq ákimdik. Biz ol qatelikti moıyndap, prokýror talabyn oryndadyq, – dedi Marat Ahmetjanov.

Ákimniń aıtýynsha, qazirgi ýaqytta Býrabaı aýdanyndaǵy jerler boıynsha keshendi tekseris júrgizilip jatyr. Qaıtarylatyn ýchaskelerdiń barlyǵy tek zańsyz berilgen nemese maqsatsyz paıdalanylyp otyrǵan jerler bolmaq.

Oblys ákimi, mundaı jerler tek ulttyq parkte emes, búkil el boıynsha qaıtarylyp jatyr. Mysaly, kezinde qurylys salamyn dep alyp, keıin eshqandaı nysan turǵyzbaǵan ýchaskeler bar. Olardy qaıtarý – zań sheńberinde júrip jatqan jalpyulttyq protsess ekenin atap ótti.

– Jer Konstıtýtsııaǵa sáıkes tek sot tártibimen ǵana alynady. Eger qandaı da bir kúmán bolsa, bárin sot sheshedi. Al eger jer ulttyq park qurylmaı turyp, eldi meken aýmaǵynda berilgen bolsa, ol ýchaskeler boıynsha másele múlde qaralmaıdy. Sondyqtan turǵyndardyń alańdaýyna negiz joq, – dedi Ahmetjanov.

Resmı málimet boıynsha, búginde daý týdyrǵan 1119 jer ýchaskesi anyqtalǵan. Eger menshik quqyǵy zańdy túrde rastalsa, ıelerine tıisti qujattar rásimdelip beriledi.

Eske sala keteıik, Almatyda memleket muqtajyna taǵy 32 jer telimi alynady.