Aqmola oblysynyń 8 aýdany sý tasqyny sheginen ótti
ASTANA. KAZINFORM – Aqmola oblysy TJD bastyǵynyń orynbasary Áset Jaqsylyqov óńirdegi ahýaldy baıandady.
Spıkerdiń aıtýynsha, Atbasar, Astrahan aýdandarynda Jabaı, Kolýton, Baqsyq ózenderindegi sý deńgeıi turaqtalyp, qaterli kórsetkishterden tómendedi. Qazir esh qaýip joq.
«Jarqaıyń, Esil aýdandarynyń Esil ózeninde sý deńgeıiniń aýytqýy baıqalady, bul rette qaýip az. Qazirgi ýaqytta jergilikti atqarýshy organdar, sondaı-aq Aqmola oblysynyń TJ departamenti erigen qar sýyn sorý jáne burý, ózender deńgeıin monıtorıngteý jumystaryn júrgizýde», - dedi spıker Respýblıkalyq aqparattyq shtabta ótken brıfıngide.
Qabyldanǵan sharalar nátıjesinde 8 aýdan sý tasqyny sheginen ótti jáne jaǵdaı turaqtaldy.
«Aglomeratsııa aımaǵynda sý tasqyny qaýpi tómendedi. Evakýatsııalanǵan adamdardyń 1928-i óz úılerine oraldy. Bilim-berý jáne áleýmettik nysandar qalypty rejımde jumys istep tur», - dedi Á.Jaqsylyqov.
