Aqmola oblysynyń 3 aýdanynda sý tasqyny qaýpi áli de joǵary – Marat Ospanov
ASTANA. KAZINFORM – Aqmola oblysynyń 3 aýdanynda sý tasqyny qaýpi áli de joǵary. Bul týraly Aqmola oblysy ákimdigi jumyldyrý daıyndyǵy bóliminiń basshysy Marat Ospanov aıtty.
«Aqmola oblysynda sý tasqyny kezeńi jalǵasýda. Daladan erigen sýdyń úlken kólemniń kelýine jáne aýa raıynyń jylýyna baılanysty sý basý aýmaqtary bar. Búginde evakýatsııalanǵan 526 turǵyn úılerine oraldy. Qarǵyn sýdy sorý jáne burý jumystary jalǵasyp jatyr. Qazirgi ýaqytta oblystyq 5 óńirinde sý tasqyny ahýaly turaqtalyp, shyrqaý sheginen ótti. Olar – Stepnogorsk qalasy, Birjan sal, Aqkól, Ereımentaý jáne Egindikól aýdandary. Jedel is-sharalardyń arqasynda oblystyń 25 eldi mekenindegi 2 myń úıde sý basýdan qorǵap qala aldyq. Olarda 5 myńnan astam adam turady. 18 myńnan astam úı maly der ýaqytynda qaýipsiz jerge shyǵaryldy. Bul sý tasqyny kezeńinde olardyń qyrylyp qalmaýyna múmkindik berdi. Degenmen, óńirdegi, ásirese Esil, Jarqaıyń, Shortandy aýdandarynda sý tasqyny qaýpi kúrdeli. Atbasar, Sandyqtaý jáne Astrahan aýdandarynda Jabaı men Qalqutan ózderi sýynyń aǵýy barysynda táýekel saqtalyp otyr»,- dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, eldi mekenderdi qorǵaý úshin 32 shaqyrym bóget turǵyzylyp, sý nysandarynyń 18 shaqyrym jaǵalaýy nyǵaıtyldy. Sý tasqynymen kúreske 2,5 myń adam, 1 myńnan astam tehnıka, motopompa jáne júzý quraldary jumyldyrylǵan. Qosymsha kúsh pen quraldary da jiberildi. Málik Ǵabdýllın atyndaǵy Azamattyq qorǵanys akademııasynyń kýrstanttary men ofıtserleri de belsendi kómek kórsetip jatyr. Sý tasqyny saldaryn joıýǵa 385 erikti de jumyldyrylǵan.
«Jergilikti turǵyndar da shette qalmaı, qutqarýshylarǵa ınertti materıaly bar qapshyqtardy tóseý kezinde kómek kórsetýde. Jalpy, sý tasqynyna qarsy sharalar jalǵasýda jáne erekshe baqylaýda», - dedi Marat Ospanov.
