Aqmola oblysynyń 24 myńnan astam turǵyny gazǵa qol jetkizdi
ASTANA. KAZINFORM — Aqmola oblysynda eki aýyldy gazdandyrý jumystary jospardan buryn aıaqtaldy, dep habarlaıdy Energetıka mınıstrliginiń baspasóz qyzmeti.
— Aqmola oblysy Tselınograd aýdanynda Qarajar jáne Qaraótkel aýyldaryn gazben qamtý jumystary josparlanǵan merzimnen buryn aıaqtalyp, gaz berý júıesi iske qosyldy. Bastapqy jospar boıynsha 2028 jylǵa deıin jalǵasýy tıis bolǵan qurylys-montaj jumystary tolyq aıaqtaldy. Infraqurylymnyń merziminen buryn paıdalanýǵa berilýiniń arqasynda elorda mańyndaǵy 24 myńnan astam turǵyn kógildir otynǵa qol jetkizdi, — delingen habarlamada.
Joba aıasynda shamamen 240 shaqyrym jańa gaz jelisi tartyldy. Qarajar Tselınograd aýdanynda tabıǵı gazben tolyq qamtylǵan jetinshi, al Qaraótkel segizinshi eldi meken boldy. Eki nysandy bir mezgilde iske qosýǵa olardyń biryńǵaı magıstraldyq jeli boıynda ornalasýy múmkindik berdi.
Qarajar aýylynda 53 shaqyrymǵa jýyq gaz jelisi tartylyp, bes myńǵa jýyq turǵyn tabıǵı gazǵa qol jetkizdi. Al Qaraótkelde jańa gaz jelileriniń uzyndyǵy 185 shaqyrymdy qurady. Aýylda 4 myńnan astam otbasy turady, búginde 1,5 myńǵa jýyq abonent gazben jabdyqtaý júıesine qosylǵan. Eldi mekendi gazdandyrý bes iske qosý kesheni boıynsha kezeń-kezeńimen júrgizildi. Onyń alǵashqy ekeýi ótken jyldyń jeltoqsanynda paıdalanýǵa berilse, qalǵan úsh keshen bıyl tolyq aıaqtaldy.
Tselınograd aýdanynyń turǵyndaryn tabıǵı gazben qamtamasyz etý jumystary jalǵasady. Bıyl Qyzylsýat aýylynda tıisti joba júzege asyrylyp jatyr. Jumystar aıaqtalǵannan keıin 3 myńǵa jýyq turǵyn tabıǵı gazǵa qol jetkizedi.
Sonymen qatar Aqmol, Qabanbaı batyr, Ótemis, Qyzyljar, Nuresil jáne Qajymuqan aýyldaryn gazdandyrý boıynsha jobalyq-smetalyq qujattama ázirlenip jatyr. Atalǵan jobalardy iske asyrý 2027 jylǵa josparlanǵan. Nátıjesinde 30 myńnan astam turǵyndy tabıǵı gazben qamtamasyz etý kózdelip otyr.
Buǵan deıin Qyzylordada gaz tutynýshylardyń quqyǵy buzylǵanyn jazǵanbyz.
