Aqmola oblysyndaǵy JEO-da slesar 68 metr bıiktikten qulap ketti

KÓKShETAÝ. KAZINFORM – Stepnogorsk jylý elektr ortalyǵynda sorǵyny bólshekteý kezinde 29 jastaǵy slesar 68 metr bıiktikten qulap ketti.

Kásiporyn baspasóz qyzmetiniń málimetinshe, 11 aqpanda «Stepnogorsk JEO» JShS-niń týrbına tsehynda óndiristik mindetterin oryndaý barysynda óndiristik-tehnıkalyq bólim slesari baspaldaqtan qulaǵan. Zardap shekken qyzmetker jedel járdem brıgadasymen Stepnogorsk qalasynyń kópbeıindi ortalyq aýrýhanasyna jetkizilgen. Onyń ómirine qaýip tónip turǵan joq.

Aqmola oblysy boıynsha Memlekettik eńbek ınspektsııasy oqıǵanyń mán-jaıyn naqtylady.

– Jóndeý slesari № 4 aınalym sorǵysyn demontajdaý kezinde tepe-teńdigin saqtaı almaı, montajdyq oıyq arqyly tómen qulaǵan. Jaraqattyń aýyrlyǵy anyqtalýda. Oqıǵanyń barlyq mán-jaıy zerdelenip jatyr. Atalǵan fakti boıynsha Aqmola oblysy boıynsha Memlekettik eńbek ınspektsııasy arnaıy tergep-tekserý júrgizedi, – dep túsindirdi vedomstvo.

Aqmola oblystyq densaýlyq saqtaý basqarmasynyń baspasóz qyzmeti habarlaýynsha, 1996 jyly týǵan naýqas 11 aqpanda saǵat 15:45-te bas aınalý, bas aýrýy, jalpy álsizdik jáne esinen taný shaǵymymen túsken. Er adam 68 metr bıiktikten qulaǵan.

– Ókpege kompıýterlik tomografııa jasaldy, sol jaqtaǵy 5-8 qabyrǵalardyń synýy, pnevmotoraks anyqtaldy. Pýnktsııa jasalyp, Bıýlaý ádisi boıynsha drenaj qoıyldy, aýa shyǵaryldy. Jaǵdaıy ortasha aýyrlyqta, turaqty, – dep habarlady dárigerler.

Stepnogorsk qalasynyń polıtsııa qyzmetkerleri de oqıǵanyń mán-jaıyn anyqtaý boıynsha qajetti sharalardy júrgizip jatyr.

Eske salaıyq, 2025 jylǵy qazanda Jezqazǵanda kommýnaldyq jelilerdi jóndeý kezinde jumysshy qaza tapqany habarlanǵan bolatyn.