Aqmola oblysyndaǵy toıda jeti adam ýlandy

ASTANA.KAZINFORM — Aqmola oblysynyń Ereımentaý aýdanynda jappaı ýlaný oqıǵasy tirkeldi.

Aqmola oblystyq ІІD baspasóz qyzmetiniń habarlaýynsha, jappaı ýlaný oqıǵasy aýdandyq aýrýhananyń juqpaly aýrýlar bólimine birdeı aýyrsyný belgilerimen jeti adam túskennen keıin habarlanǵan. Aldyn ala tergeý barysynda olardyń densaýlyǵynyń nasharlaýyna tamaqtan ýlaný sebep bolýy múmkin ekeni anyqtaldy.

— Ereımentaý ýchaskelik polıtsııa ınspektory oqıǵa týraly dereý tıisti organdarǵa habarlady. Tergeý barysynda zardap shekkenderdiń barlyǵy birdeı sharaǵa qatysqany anyqtaldy, — dep habarlady departamenttegiler.

«Sanıtarlyq erejelerdi nemese gıgıenalyq normalardy buzý» baby boıynsha sotqa deıingi tergeý bastaldy. Quqyq qorǵaý organdary ýlaný kózi men yqtımal kinálilerdi anyqtap jatyr.

Polıtseılerdiń málimetinshe, jyl basynan beri Ereımentaý aýdanynda sanıtarlyq tártip buzýshylyqqa qatysty osyndaı eki oqıǵa tirkelgen.

— Bul kórsetkish az bolyp kóringenimen, mundaı oqıǵalardyń saldary adam ómiri men densaýlyǵyna asa qaýipti bolýy múmkin, — dep basa aıtty quqyq qorǵaý organdary.

Ereımentaý aýdandyq aýrýhanasynyń málimetinshe, zardap shekkenderdiń barlyǵy qazir úılerine shyǵarylǵan. Aqmola oblysynyń sanıtarlyq-epıdemıologııalyq baqylaý departamenti olardyń vedomstvosy da ýlaný faktisi boıynsha tekserý júrgizip jatqanyn, onyń nátıjesi keıinirek habarlanatynyn aıtty.

Esterińizge sala keteıik, buǵan deıin Atyraý oblysynda 47 adam sýshıden ýlanyp, dámhana jumysy toqtatylǵanyn habarlaǵan edik.