Aqmola oblysyndaǵy tas jolda iri jol-kólik oqıǵasy boldy

ASTANA. KAZINFORM — Polıtsııa qyzmetkerleri júrgizýshilerdi asa saq bolýǵa shaqyrdy, dep habarlaıdy Kazinform tilshisi.

Aqmola oblystyq polıtsııa departamentiniń habarlaýynsha, 5 jeltoqsanda shamamen saǵat 14:21–de Ekaterınbýrg-Almaty tas jolynyń 1300-shaqyrymynda jol-kólik oqıǵasy boldy.

— Oqıǵa ornyna kelgen quqyq qorǵaý organdarynyń qyzmetkerleri Astanaǵa qaraı kele jatqan DAF júk kóliginiń júrgizýshisi taıǵaq jolda kólikti basqara almaı, qıǵash tosqaýylǵa soǵylǵanyn anyqtady. Muzdy jolda kólikti basqara almaı, artynan kele jatqan Chevrolet Cobalt jáne Toyota Highlander kólikteri júk kóligimen soqtyǵysty. Sonymen qatar, Kia K5 júrgizýshisi de apatty baıqap, tejeýge tyrysyp, kólikti basqara almaı, tosqaýylǵa soǵyldy, — delingen polıtsııa málimdemesinde.

Apat saldarynan kólikterdiń eki jolaýshysy aýrýhanaǵa jetkizildi. Quqyq qorǵaý organdarynyń qyzmetkerleri tergeý aıaqtalǵannan keıin kinálilerge tıisti sharalar qoldanylatynyn atap ótti.

Polıtsııa júrgizýshilerge birqatar jolda jyldamdyq shekteýleri engizilgenin eske salady. Júrgizýshiler qaýipsiz jyldamdyqty saqtaýy, araqashyqtyqty arttyrýy, kilt tejeýden aýlaq bolýy, jol jamylǵysynyń jaǵdaıyn eskerýi jáne tótenshe jaǵdaılar qyzmetiniń eskertýlerine qulaq asýy kerek.

Buǵan deıin elordada jol apaty saldarynan jaıaý júrginshi aıaǵynan aıyrylǵanyn jazǵanbyz.