Aqmola oblysyndaǵy mektepterde 165 balanyń jeke derekteri zańsyz jarııalanǵan
ASTANA. KAZINFORM – Stepnogorsk qalasynyń prokýratýrasy bilim berý uıymdarynyń ınternet-resýrstarynda kámeletke tolmaǵandardyń derbes derekterin zańsyz jarııalaý faktilerin anyqtady.
Prokýratýranyń málimetinshe, jekelegen mektepter men bilim bóliminiń saıttarynda 165 balanyń jeke málimetteri ashyq ornalastyrylǵan.
«Jarııalanǵan qujattarda kámeletke tolmaǵandardyń tegi, aty-jóni, oqıtyn orny jáne áleýmettik mártebesi týraly aqparat bolǵan. Olardyń qatarynda kópbalaly jáne az qamtylǵan otbasylardan shyqqan, sondaı-aq qorǵanshylyqtaǵy balalar bar», – dep habarlady qadaǵalaý organy.
Prokýratýra mundaı aqparattyń erkin qoljetimdilikte bolýy olardyń ári qaraı zańsyz taralý qaýpin týdyrǵanyn atap ótti.
Qadaǵalaý aktisiniń nátıjesinde zańbuzýshylyqtar joıylyp, balalardyń derbes derekteri ınternet-resýrstardan alynyp tastaldy.
Sondaı-aq zań talaptaryn buzýǵa jol bergen laýazymdy tulǵalar tártiptik jaýapkershilikke tartyldy.
Aıta keteıik, Qazaqstan jeke derekterdi qorǵaý salasyndaǵy halyqaralyq komıtetke baqylaýshy retinde qosylǵan bolatyn.
