Aqmola oblysyndaǵy qus fabrıkasy jylyna 200 mln jumyrtqa óndirýdi josparlap otyr
ASTANA. KAZINFORM- Aqmola oblysyndaǵy «Aqkól Qus» qus fabrıkasynyń jyldyq óndiristik qýatyn 90 mln-nan 200 mln danaǵa deıin ulǵaıtý josparlanyp otyr. Joba aıasynda jumyrtqalaıtyn taýyqtarǵa arnalǵan tórt zamanaýı korpýs salynyp, óndiristik ınfraqurylym jańǵyrtylady.
Bul týraly óńirge jumys saparymen barǵan Aýyl sharýashylyǵy vıtse-mınıstri Amanǵalı Berdalınniń kásiporyn jumysymen tanysýy barysynda málim boldy.
Jobaǵa sáıkes, jalpy syıymdylyǵy 324 myń basqa arnalǵan tórt korpýs salý kózdelgen. Bul jylyna qosymsha 110 mln danaǵa deıin jumyrtqa óndirýge jáne kásiporynnyń jalpy óndiristik qýatyn 200 mln danaǵa jetkizýge múmkindik beredi.
Sonymen qatar jas qustardy ósirýge arnalǵan ǵımarattar salý, saǵatyna 30 myń jumyrtqaǵa deıin suryptaıtyn jelisi bar qoıma turǵyzý jáne jem tsehynyń qýatyn keńeıtý josparlanǵan. Infraqurylymdy jańartý óndiristik úderisterdiń tıimdiligin arttyrýǵa, qus sanynyń ósýine baılanysty qajettilikterdi qamtamasyz etýge jáne ónimniń ózindik qunyn tómendetýge baǵyttalǵan.
Qazirgi ýaqytta jobanyń jobalaý-smetalyq qujattamasy ázirlenip, memlekettik saraptamanyń oń qorytyndysy alynǵan. Qurylys jumystaryn 2026 jylǵy qarashada bastaý kózdelgen. Qytaı men Eýropadan jabdyqtardy jetkizý jáne montajdaý jumystary kelesi jylǵa belgilengen. Jobanyń birinshi kezeńin 2027 jylǵy sáýirde aıaqtaý, al tolyq óndiristik qýatqa 2028 jyldyń ortasynda shyǵý josparlanǵan.
2014 jyldan beri jumys istep kele jatqan «Aqkól Qus» fabrıkasy negizinen taǵamdyq taýyq jumyrtqasyn óndirýge mamandanǵan. Qazir kásiporynda jumyrtqalaıtyn taýyqtarǵa arnalǵan alty korpýs, jas qustardy ósirýge arnalǵan eki korpýs, jeke jem tsehy jáne jumyrtqany suryptaý jabdyqtarymen qamtamasyz etilgen qoıma bar. Qus sany 300 myń bastan asady. Jyl basynan beri 48 mln dana jumyrtqa óndirilgen.
Kásiporyn ónimderi Aqmola jáne Túrkistan oblystaryna, Astana men Kókshetaý qalalaryna, sondaı-aq Qyrǵyzstanǵa jetkiziledi. Sońǵy eki jylda fabrıkada qustardy ustaý jáne ósirý jabdyqtary jańartyldy.
Kásiporynnyń óndiristik qýatyn keńeıtý otandyq aýyl sharýashylyǵy ónimderiniń kólemin arttyrýǵa jáne eldiń azyq-túlik qaýipsizdigin nyǵaıtýǵa baǵyttalǵan.
Qoldanystaǵy qus fabrıkalaryn jańǵyrtý jáne jańa ınvestıtsııalyq jobalardy iske asyrý nátıjesinde 2028 jylǵa qaraı Aqmola oblysynda taǵamdyq jumyrtqa óndirisin jylyna 1 mlrd danaǵa deıin jetkizý mejelenip otyr.
Búginde óńir Qazaqstannyń taǵamdyq jumyrtqaǵa degen qajettiliginiń 15%-yn qamtamasyz etedi. Sondaı-aq eldegi qus etiniń jalpy óndirisiniń 30%-y Aqmola oblysynyń úlesine tıesili.
Osyǵan deıin eldegi qus sharýashylyǵy boıynsha ımportqa táýeldiliktiń sebebi týraly jazdyq.
