Aqmola oblysyndaǵy gaz ballon jarylysy meshitte bolmaǵan – meshit basshylyǵy

ASTANA. KAZINFORM – Aqmola oblysynyń Qorǵaljyn aýdany Sabyndy aýylyndaǵy meshit basshylyǵy eldi mekende bolǵan tótenshe jaǵdaıǵa qatysty túsinik berdi.

«Aqparat kózderindegi Aqmola oblysy, Qorǵaljyn aýdany, Sabyndy aýylyndaǵy tótenshe jaǵdaıdyń meshitte bolmaǵanyn málimdeımiz. Sabyndy aýylynda «Jaqsykeldi» meshiti halyqqa qyzmet jasap tur. Gaz ballony jarylysy bolǵan ǵımaratty jergilikti turǵyndar buryn namazhana retinde paıdalanǵan. Qazirgi ýaqytta namazhana retinde de paıdalanbaıdy, sebebi jańa meshit salyndy. Jańa meshit salynǵan soń ol ǵımarat as ótkizetin oryn retinde paıdalanyp kelgen», - dep túsindirilgen Naýat Hazret meshitiniń jelide paraqshasynda. 

Buǵan deıin habarlaǵanymyzdaı, Aqmola oblysynda as berý kezinde gaz ballony jarylyp, úsh adam mert boldy. 

Jarylystan zardap shekken 16 adam Astana qalasyna aýrýhanaǵa jetkizildi. Onyń arasynda 13 eresek jáne 3 bala bar.