Aqmola oblysyndaǵy elevatorlar 70 paıyzǵa tolǵan
ASTANA. KAZINFORM — Búgingi kúni Aqmola oblysyndaǵy astyq qabyldaý kásiporyndary táýlik boıy jumys istep, astyq qabyldap jatyr, dep habarlaıdy oblys ákimdiginiń baspasóz qyzmeti.
Oblys ákiminiń tapsyrmasymen óńirde astyq jınaý jumystaryn úılestirý maqsatynda oblystyq shtab quryldy. Shtabtyń basty mindeti — astyq jınaý naýqanynyń barysyn únemi baqylaýda ustaý, astyq qabyldaý kásiporyndarynyń jumysyn qadaǵalaý, astyqty qabyldaý men keptirýdiń úzdiksiz jumysyn qamtamasyz etý.
«Jınaý kezeńinde jaýǵan mol jaýyn-shashyn agrarıılerge jańa ónimdi saqtaýdy muqııat iske asyrý qajettiligin týyndatty. Qazirgi ýaqytta 66 lıtsenzııalanǵan astyq qabyldaý kásiporyndary, 1510 aýyl sharýashylyǵy qurylymdarynyń qoımalary jáne jalpy saqtaý kólemi 7,2 mln tonna bolatyn 122 astyq keptirgishi iske qosylǵan. Búgingi kúni elevatorlarda shamamen 3 mln tonna astyq bar. Sondaı-aq, jergilikti aýyl sharýashylyǵy taýar óndirýshileri astyqtyń saqtalýyna qoldaý kórsetýde», — dedi Aýyl sharýashylyǵy jáne jer qatynastary basqarmasynyń basshysy Kenesh Álimjanov.
Qosymsha aýyl sharýashylyǵy taýar óndirýshileri 500 myń tonna astyqty saqtaý úshin 2,5 myńnan astam astyq qaptaryn paıdalanýda.
Aıta ketý kerek, 2024 jyly óńirdegi egistik alqabynyń jalpy aýdany 5,4 mln gektardy qurady, onyń ishinde 4,7 mln gektary dándi jáne dándi-burshaqty daqyldar, 269 myń gektary maıly daqyldar, 421 myń gektary mal azyǵy daqyldary, 2,4 myń gektary kartop jáne 1,4 myń gektary kókónis daqyldaryna bólingen.
Sondaı-aq, oblys agrarııleri mıneraldy tyńaıtqyshtardy jáne elıtalyq tuqymdardy qoldanýdy edáýir arttyrǵanyn atap ótken jón. Jınaý naýqanynyń qorytyndysy boıynsha gektaryna 14,1 tsentnerden ortasha ónimdilikpen 6,6 mln tonna rekordtyq astyq jınaldy. Bul kórsetkish agrarlyq jumystyń tıimdiligin jáne eginniń joǵary shyǵymyn rastaıdy.
Buǵan deıin, Aqmola oblysynda bıdaıdy tereń óńdeý zaýyty salynatyny málim boldy.
