Aqmola oblysyndaǵy buzylǵan bóget qalpyna keltirildi
ASTANA. KAZINFORM - Aqmola oblysy, Qorǵaljyn aýdanynda, Sabyndy aýylynan eki kılometr qashyqtyqta ornalasqan «Shóptikól» bógetin qalpyna keltirý jumystary júrip jatyr.
QR Tótenshe jaǵdaılar mınıstrligi baspasóz qyzmetiniń habarlaýynsha, qazirgi tańda bóget qalpyna keltirildi. Sý deńgeıi turaqty baqylaýda. Jaǵdaıdyń kúrdelenbeýi úshin ınertti materıaldarmen qapshyqtardy daıyndalyp jatyr. Búgingi ýaqytqa deıin 1500 qapshyq daıyndaldy.
Oqıǵanyń saldaryn joıýǵa TJM kúshteri men quraldary, jergilikti atqarýshy organdar, aýdandyq polıtsııa bólimi jáne jol qyzmetteri jumyldyrylǵan.
Jalpy shamamen 260 adam jáne 70 tehnıka jumyldyryldy. «Astana – Qorǵaljyn» avtojoly boıymen 1100 metr uzyndyqta, sondaı-aq Sabyndy aýylynda 500 metr uzyndyqta ınjenerlik jumystar júrgizilip jatyr.
- Erip jatqan sýdy aǵyzý úshin 100 metr uzyndyqta aınalma kanal qazyldy. Bul baǵyttaǵy jumystar Tótenshe jaǵdaılar mınıstrliginiń baqylaýynda, - delingen habarlamada.
Osyǵan deıin Aqmola oblysynyń Qorǵaljyn aýdanynda bóget buzylǵany týraly jazdyq.