Aqmola oblysyndaǵy aýyl mektebinde 5 pen 6-synyp biriktirilgen
ASTANA. KAZINFORM — Aqmola oblysy Zerendi aýdany Qonysbaı aýylyndaǵy mektepte 5 pen 6-synyp oqýshylary jańa oqý jylyn birge oqyp bastaǵan bolatyn. Ata-analardyń áleýmettik jelidegi qarsylyǵynan keıin aýdandyq bilim bólimi synyptardy qaıta bólý týraly sheshim qabyldady.
Máselege áleýmettik jelidegi jergilikti paraqshadaǵy jazba sebep bolǵan. Onda ata-analar eki synyp oqýshylarynyń biriktirilgenin aıtqan.
Jazbaǵa pikir bildirgenderdiń pikiri ekige bólindi. Keıbiri mundaı tájirıbe Shortandy jáne Jarqaıyń aýdandaryndaǵy aýyl mektepterinde de bar ekenin atap ótti. Alaıda olar mundaı tásildi quptamaıtynyn jazǵan.
Al keıbir qoldanýshylar synypta eki-úsh oqýshy ǵana bolsa, olardy birge oqytýdyń eshqandaı qıyndyǵy joq dep esepteıdi. Taǵy birqatar qoldanýshy 20 jyl buryn ózderiniń de osyndaı synyptarda oqyǵanyn mysalǵa keltirgen.
Oblystyq bilim basqarmasynyń baspasóz qyzmeti mundaı tájirıbeniń burynnan bar ekenin habarlady. Shaǵyn jınaqty aýyl mektepterinde synypta eki-úsh oqýshydan ǵana bilim alatyn jaǵdaılar jıi kezdesedi. Mundaı synyptar biriktirilgen kezde muǵalim sabaq josparyn jaǵdaıǵa qaraı ázirleıdi. Sabaqtyń bir bóliginde bir synypqa taqyryp túsindirilse, ekinshi bóliginde basqa synyppen jumys júrgiziledi.
Zerendi aýdandyq bilim bóliminiń málimetinshe, shaǵyn jınaqty mektepterdegi synyptardy biriktirý oqýshylardyń naqty sany men qoldanystaǵy zańnama talaptary eskerile otyryp júzege asyrylady.
— Oqý-aǵartý mınıstriniń 2022 jylǵy 31 tamyzdaǵy № 385 buıryǵymen bekitilgen orta bilim berý uıymdary qyzmetiniń úlgilik qaǵıdalarynyń 97-tarmaǵyna sáıkes, shaǵyn jınaqty mektepterde jasy ártúrli oqýshylardy biriktirilgen synyptarda oqytýǵa ruqsat etiledi. Atap aıtqanda, jas aıyrmashylyǵy 1-2 jyl bolatyn eki nemese úsh synypty biriktirýge bolady, — dep túsindirdi vedomstvo.
Sonymen qatar ata-analardyń pikirin jáne osy oqý jylynda oqýshylar sanynyń artqanyn eskere otyryp, aýdandyq bilim bólimi buǵan deıin biriktirilgen synyptardy qaıta bólý týraly sheshim qabyldaǵan.
— Oqý protsesi tıisti synyptardyń oqý jospary men bilim berý baǵdarlamalaryna sáıkes júrgiziledi. Bilim berý protsesin uıymdastyrý jáne pedagogterdiń oqý júktemesin bólý máselesi aýdandyq bilim bóliminiń baqylaýynda, — dep tolyqtyrdy vedomstvo.
Buǵan deıin sarapshylar elimizdiń bilim berý júıesin jetildirý jáne Prezıdenttiń osy baǵyttaǵy tapsyrmalary jóninde pikir bildirgen edi.
