Aqmola oblysynda júzdegen jylqynyń neden qyrylǵany belgili boldy
ASTANA. KAZINFORM - Veterınarlyq baqylaý jáne qadaǵalaý komıteti tóraǵasynyń mindetin atqarýshy Qaıyrjan Baıjanov, Mal sharýashylyǵy departamenti dırektorynyń orynbasary Erlan Іlııasov jáne birqatar sala mamandary aýdandarǵa bardy.
Aýa raıynyń qolaısyzdyǵynan jáne jaıylym jerleriniń qatqaq bolýynan Birjan sal ýchaskesinde (Mamaı aýyly) jylqylardyń tebindeýi qıyndap, eń jas jáne kári maldar qyrylyp qalǵan edi.
Jergilikti atqarýshy organdardyń dereginshe aýylda 1116 bas jylqy ólimi tirkelgen.
Halyqtyń negizgi bóligi janýarlardy kútip-baǵýdy jeke aýlasyna aýystyrǵan. Jaıylymda tek qana ıesi qalada jáne basqa eldi mekende turatyn, sondaı-aq óz malyn azyqpen qamtamasyz etpegen turǵyndardyń maly qalǵan.
Jalǵyzqaraǵaı aýylynda (Aqkól aýdany) turǵyndardyń 1 220 bas, «Ashat» ShQ 290 bas jylqy bar.
Kóterem bolǵan jáne aıaqtarynyń muz qabyǵynan jaraqattanýynan jaıylymdaǵy jylqylardy eldimekenge jetkizý múmkin bolmaǵan.
Jergilikti turǵyndardyń aıtýynsha 55 bas jylqy ólgen.
Qarabulaq (Stepnogor aýdany) aýylynda 4 276 bas jylqy esepte tur. Munda da jaǵdaı ózge aýdandarmen uqsas.
Jalpy Stepnogor aýdanynda - 14 375 bas jylqy maly bar. Qystyń basynan búgingi kúnge deıin Stepnogorsk óńiri boıynsha 42 bas jylqy shyǵynǵa ushyraǵan.
Mamandar aýdandardy aralaý barysynda 13 bas maldyń ólimin tirkedi. Jylqylardyń qys mezgilinde qyrylýyna ıeleriniń maldardy fermalarda ustamaýynan jáne qajetti mólsherde jemshóp daıyndamaı, ashyǵýy sebep bolǵan.
Qabyldanatyn sharalar:
- Jeke qosalqy sharýashylyqtardaǵy 73,5 myń bas jylqy qoraǵa aýystyryldy;
- Kúndizgi jaıylymǵa tebindeýge 71,8 myń bas jylqy jiberiledi (túngi ýaqytta tıisti azyqtandyrýy bar qoralarǵa aıdalady);
- Oblys ákimi orynbasarynyń basshylyǵymen Jedel shtab jumys isteıdi;
- Jergilikti jerlerde mal basyn jemmen qamtamasyz etý boıynsha shara qabyldanady (shóp, sondaı-aq jemdik astyq qosymsha ákelinedi), keıinnen qoldaǵy malǵa jetkizilgen jemshóp qaldyqtaryna revızııa júrgiziledi;
- Jaıylymdy qamtamasyz etý úshin qar jamylǵysynyń ústińgi qabatyn qopsytý jumysy júrgiziledi.
Jalpy, Aqmola oblysy veterınarııa basqarmasynyń málimeti boıynsha, 2023 jyldyń jeltoqsanynan bastap qazirgi ýaqytqa deıin 117 bas jylqynyń ólimi tirkelgen.
Onyń ishinde tek 27 bas jylqy ǵana jergilikti jerde veterınarııalyq esepke alynǵan.
Qalǵan jylqylar naqty tirkeýde joq, ıeleri de belgisiz.
