Aqmola oblysynda jumysshynyń ústine júk tıegish qulap, mert boldy
KÓKShETAÝ. KAZINFORM - Aqmola oblysynda 37 jastaǵy jumysshynyń ústine júk tıegish qulap, ol alǵan dene jaraqatynan kóz jumdy. Polıtsııa sotqa deıingi tergeýdi bastady.
Aqmola oblysy Polıtsııa departamenti baspasóz qyzmetiniń málimetinshe, oqys oqıǵa jaıynda Kókshetaý qalasynyń polıtsııa basqarmasyna jedel járdem stantsııasynyń feldsheri habarlaǵan.
Belgili bolǵandaı, er adam jergilikti kásiporyndardyń birinde jumys istegen. Jóndeý jumystary kezinde onyń ústine júk tıegish qulaǵan.
«Osyǵan baılanysty Qylmystyq kodekstiń 156-babynyń 3-bóligi boıynsha (abaısyzda adam ólimine ákep soqtyrǵan eńbekti qorǵaý erejelerin buzý) sotqa deıingi tergeý amaldary qolǵa alyndy. Sot-medıtsınalyq saraptama taǵaıyndaldy. Sonymen birge, memlekettik eńbek ınspektory tarapynan da tekseris júrgizilip jatyr», - dep túsindirdi vedomstvodan.
Aıta ketsek, budan buryn Aqmola oblysynda jylý ortalyǵynyń bıiktigi 32 metr munarasynyń joǵary tusynda ornalasqan uıaly baılanys antennasyn jóndeý kezinde mobıldi baılanys kompanııasynyń qyzmetkeri abaısyzda qulap ketkenin jazǵan edik.
