Aqmola oblysynda jumysshyny urǵan ákim jazaǵa tartyldy
Astrahan aýdandyq sotynda Ostrogorsk aýyldyq okrýginiń burynǵy ákimine qatysty ákimshilik quqyq buzýshylyq týraly is qaraldy, dep habarlaıdy QazAqparat tilshisi Aqmola oblystyq sotynyń baspasóz qzymetine silteme jasap.
Sotta belgili bolǵandaı, Ostrogorsk aýyldyq okrýginiń ákimi men jergilikti JShS-niń jumysshysy arasynda sýǵa qatysty janjal týyndaǵan. Janjal kezinde ákim qolymen jumysshynyń jelke tusynan uryp jibergen, ol etbetimen jerge qulaǵan.
- Aıyptalýshynyń kinási jábirlenýshiniń, kýágerlerdiń aıǵaqtarymen, sarapshynyń qorytyndysymen rastaldy, ıaǵnı syzat jáne kógerý túrinde dene jaraqatyn tabyldy, - dedi vedomstvodan.
Sottyń baspasóz qyzmetinen atap ótkendeı, QR Ákimshilik quqyqbuzýshylyq kodeksiniń 73-1-babynyń 1-bóligi boıynsha densaýlyqqa qasaqana jeńil zııan keltirgeni úshin 15 aılyq eseptik kórsetkish mólsherinde aıyppul túrinde jaza nemese 15 táýlikke qamaýǵa alý jazasy kózdelgen.
- Sot jeńildetetin mán-jaılardy, ıaǵnı aıyptalýshynyń birinshi ret ákimshilik jaýapqa tartylyp otyrǵandyǵyn, oń minezdemesine, sondaı-aq aýyrlatatyn mán-jaılardyń bolmaýyn eskerip, 15 aılyq eseptik kórsetkish mólsherinde aıyppul taǵaıyndady. Sonymen qatar, sot oblys ákiminiń atyna jeke qaýly shyǵardy, onda ol tómen turǵan ákimderdiń qyzmetine baqylaýdyń joqtyǵyna jáne tıisti den qoıý sharalaryn qabyldaýǵa nazar aýdardy. Sot sheshimi zańdy kúshine engen joq, - dep tolyqtyrdy vedomstvodan.
Aıta ketsek, budan buryn Aqmola oblysy boıynsha Memlekettik qyzmet isteri departamentiniń basshylyǵy Astrahan aýdany Ostrogorsk aýyldyq okrýginiń ákimi T. Qurman týraly áleýmettik jelidegi jarııalanymǵa qatysty túsinikteme bergenin jazǵan edik.
