Aqmola oblysynda jumysyna salǵyrt qaraǵan eki aýdannyń ákimine qatań sógis jarııalandy
KÓKShETAÝ. KAZINFORM - Aqmola oblysynda Jarqaıyń jáne Ereımentaý aýdandarynyń ákimderine qatań sógis jarııalandy.
Aqmola oblysy ákimdigi baspasóz qyzmetiniń málimetinshe, Jarqaıyń aýdanynyń ákimi Janbolat Hamıtovke Aqmola oblysynyń ákimi Marat Ahmetjanovtyń sý tasqynynyń saldaryn joıý jónindegi birqatar tapsyrmalaryn tıisinshe oryndamaǵany úshin qatań sógis jarııalanǵan.
«Jarqaıyń aýdanynyń ákimdigi belgilengen merzimde páterler men úıler satyp alý, sondaı-aq sý tasqynynan keltirilgen múliktik zııan úshin ótemaqy tóleý jónindegi jumystardy uıymdastyrýdy aıaqtamady, turǵyn úıge quqyq belgileıtin qujattardy ýaqytynda qalpyna keltirý men rásimdeýdi qamtamasyz etpedi, sonyń saldarynan zardap shekken otbasylarǵa úı satyp alý merzimderi ózgerdi. Halyqpen júrgiziletin aldyn alý jumysynyń osaldyǵy turǵyndardyń narazylyǵyna ákeldi. Oblys ákiminiń ókimimen Janbolat Hamıtov qatań sógis túrinde tártiptik jazaǵa tartyldy», - dedi vedomstvodan.
Al Ereımentaý aýdanynyń ákimi Nurlan Muqatovqa qoqys shyǵarý boıynsha jumystyń tıisti deńgeıinde júrgizilmegeni úshin qatań sógis jarııalanǵan.
«Aýdan ortalyǵynyń kóshelerinde egeýquıryqtar men antısanıtarııanyń oryn alýymen jaǵdaı ýshyǵyp ketti. Sonymen qatar, Aqmola oblysynyń ákimi Marat Ahmetjanovtyń aýdandy abattandyrý jónindegi tikeleı tapsyrmasyna da, BAQ pen áleýmettik jelilerdegi birqatar jarııalanymdardan keıin de aýdan ákimdigi tarapynan tıisti nazar aýdarylmady. Oblys ákiminiń ókimimen Nurlan Muqatovqa qatań sógis túrinde tártiptik jaza qoldanyldy», - dep tolyqtyrdy vedomstvodan.
Aıta ketsek, budan buryn Aqmola oblysynda ákimdik ǵımaratynda tóbelesken ákim orynbasary men apparat basshysyna aıyppul salynǵanyn jazǵan edik.
