Aqmola oblysynda júkti áıel men kúıeýi jol apatynan kóz jumdy

ASTANA. KAZINFORM — Aqmola oblysynda besinshi balasyna aıaǵy aýyr áıel men onyń kúıeýi jol apatynan qaıtys boldy. 

Aqmola oblystyq polıtsııa departamentiniń baspasóz qyzmeti habarlaǵandaı, Aqsý-Bestóbe-Izobılnoe tas jolynda LADA Largus jáne Toyota Land Cruiser Prado kólikteri soqtyǵysyp, jol-kólik oqıǵasy oryn aldy.

— Jol apaty saldarynan LADA Largus kóliginiń júrgizýshisi men jolaýshysy oqıǵa ornynda qaza tapty. Sotqa deıingi tergeý amaldary júrgizilip jatyr. Onyń qorytyndysy boıynsha protsessýaldyq sheshim qabyldanady, — dep málimdedi departamenttiń baspasóz qyzmeti.

Jol-kólik oqıǵasynda tórt balanyń ákesi men anasy kóz jumdy. Áıel besinshi balasyna aıaǵy aýyr bolǵan.

Tártip saqshylary jol apatynyń aldyn alý úshin júrgizýshilerdiń, ásirese kólik kóp júretin jerlerde jyldamdyqty asyrmaýdy, kólikteriniń tehnıkalyq jaǵdaıyn qadaǵalaý mańyzdy ekenin eske saldy.

Buǵan deıin Almaty oblysynda avtobýs pen kólik soqtyǵyp, bir adam mert bolǵany týraly jazdyq.