Aqmola oblysynda júk poıyzy jaıylyp júrgen 7 jylqyny qaǵyp ketti
Aqmola oblysynda «Qyrqynshy-Saryoba» stantsııalarynyń aralyǵynda júk poıyzy jaıylyp júrgen 7 jylqyny qaǵyp ketti, dep habarlaıdy Kazinform.
Kóliktegi polıtsııa departamenti baspasóz qyzmetiniń málimetinshe, «Qyrqynshy-Saryoba» stantsııalarynyń arasynda júk poıyzynyń mashınısi temirjol boıynda jaıylyp júrgen bir úıir jylqyny kórip tejegishti qosqan.
Alaıda, júk tıelgen poıyzdy toqtatý múmkin bolmady, 7 jylqy mert boldy.
Saldarynan poıyz 38 mınýt joldan qaldy.
— Tekserý barysynda Astana stansasyndaǵy jelilik polıtsııa basqarmasynyń qyzmetkerleri japa shekken jylqynyń 45 jastaǵy astanalyqqa tıesili ekenin anyqtady. Er adamǵa qatysty Ákimshilik quqyq buzý kodeksiniń 559-babynyń 1-bóligi boıynsha ákimshilik hattama toltyrylyp, 5 AEK mólsherinde aıyppul salyndy, — dedi vedomstvodan.
Sonymen birge Soltústik Qazaqstan oblysy «Presnogorkov-Baýman» aralyǵynda da júk poıyzy bir úıir jylqyny soǵyp, úsheýi aram óldi.
Temirjolda mal jaıý qaǵıdasyn buzǵany úshin mal ıesi — Soltústik-Qazaqstan oblysynyń 43 jastaǵy turǵyny ákimshilik jaýapqa tartyldy.
Qalǵan 25 bas jylqy qoraǵa qamaldy.
Jalpy, jyl basynan beri kóliktegi polıtsııa departamentinde poıyzdardyń shuǵyl tejelýiniń 1786 deregi tirkeldi, elimizdiń temir jolynda 1055 ret úı janýarlaryn basyp ketý deregi tirkeldi.
Onyń ishinde 571 bas jylqy, 309 bas iri qara, 87 usaq mal bar.
Osy rette tártip saqshylary óńir turǵyndaryn temirjol mańynda mal jaıǵanda saq bolýǵa shaqyrady.
