Aqmola oblysynda jolda qalǵan 900-ge jýyq avtokólik polıtsııaǵa ilesip júrdi

Aýa raıyna baılanysty Aqmola oblysynda barlyq baǵyttaǵy avtojoldarda kólik qozǵalysyna shekteý qoıyldy. Jolda qalǵan 900-ge jýyq avtokólik polıtsııa kóligine ilesip júrdi, dep habarlaıdy Kazinform tilshisi.

Oblystyq PD baspasóz qyzmetiniń málimetinshe, 8 qańtarda oblys aýmaǵyndaǵy dúleı jel men aqtútik boranǵa baılanysty «Almaty – Ekaterınbýrg», «Astana – Petropavl», «Astana – Qaraǵandy», «Astana – Ereımentaý – Shiderti», «Kókshetaý – Rýzaevka» baǵytyndaǵy halyqaralyq jáne respýblıkalyq, sondaı-aq oblystyq jáne jergilikti mańyzy bar joldar jabyldy. Jolda qar qursaýynda qalǵan myńǵa jýyq avtokólikke polıtsııa qyzmetkerleri kómektesti.

«Aýa raıyna baılanysty polıtsııa batalony men patrýldik polıtsııa rotasynyń ekıpajdary kúsheıtilgen rejımde jumys isteýde. Búgin saǵat 13:00-de Astana qalasyna deıin 530 (460 jeńil, 70 júk) avtokóliktiń birinshi kolonnasy polıtsııa kóligine ilesip júrdi. Keri baǵytta 350 kólik quralynyń taǵy bir kolonnasy polıtsııa kóliginiń sońyna ilesti», - dedi vedomstvodan.

Osy rette, tártip saqshylary turǵyndarǵa borandy kúnderi alys jolǵa shyqpaýǵa keńes beredi.

Eske salaıyq, Qazaqstannyń 9 oblysynda aýa raıyna baılanysty eskertý jarııalandy.