Aqmola oblysynda jol jóndeýge bólingen 78 mln teńge jymqyrylǵan
ASTANA. KAZINFORM — Aqmola oblysy Bulandy aýdanynyń prokýratýrasy Nıkolskoe aýylyndaǵy joldardy jóndeýge bólingen bıýdjet qarajatynyń jymqyrylǵanyn anyqtady. Keltirilgen shyǵyn 78 mln teńge dep baǵalanyp otyr.
Prokýratýra málimetinshe, 2023 jyly aýdannyń turǵyn úı-kommýnaldyq sharýashylyq bólimi merdiger uıymmen Nıkolskoe aýylyndaǵy uzyndyǵy 5,4 shaqyrym aýyl ishindegi joldardy ortasha jóndeýge 167,8 mln teńgege shart jasasqan.
Sharttyń merzimi 2024 jylǵy jeltoqsanda aıaqtalǵan. Osy ýaqyt ishinde bıýdjetten 103 mln teńge jumsalǵan.
Alaıda tekserý barysynda 78 mln teńgeniń jumysy oryndalmaǵany anyqtaldy. Tergeý málimetinshe, bul qarajat jol jóndeýge qatysy joq maqsattarǵa jumsalǵan.
Osy fakti boıynsha aýdannyń turǵyn úı-kommýnaldyq sharýashylyq bóliminiń burynǵy basshysy men merdiger uıym basshylaryna qatysty asa iri kólemde bıýdjet qarajatyn jymqyrý deregimen sotqa deıingi tergep-tekserý bastaldy.
Qylmystyq is Aqmola oblysynyń arnaıy prokýrorlarynyń óndirisine berildi.
Qylmystyq-protsestik kodekstiń 201-babyna sáıkes, ózge aqparat jarııa etilmeıdi.
Eske salaıyq, buǵan deıin Mańǵystaý oblysynda aýrýhananyń bas esepshisi 32 mln teńgeden astam qarjyny jymqyrǵany úshin sottalǵanyn habarlaǵan edik.
