Aqmola oblysynda jol-kólik oqıǵasynan eki adam mert bolyp, tórteýi jaraqattandy

PETROPAVL. KAZINFORM – Aqmola oblysynda bolǵan jol-kólik oqıǵasyna qatysty polıtseıler sotqa deıingi tergeýdi bastady.

Oblystyq polıtsııa departamenti baspasóz qyzmetiniń málimetinshe, 16 tamyz kúni saǵat 11.45 mınýt ketkende «Astana-Petropavl» tas jolynyń 277 shaqyrymynda, Kókshetaý men Şýchınsk qalasynyń arasynda eki jeńil kólik soqtyǵysyp qaldy. 

— Jol-kólik oqıǵasy saldarynan Volkswagen Passat avtokóliginiń júrgizýshisi men bir jolaýshy sol jerde kóz jumdy. Kia K5 avtokóliginiń júrgizýshisi men úsh jolaýshysy túrli jaraqatpen medıtsınalyq mekemege jetkizildi. Qazirgi ýaqytta sotqa deıingi tergeý bastaldy, onyń nátıjesi boıynsha protsestik sheshim qabyldanatyn bolady, - dedi patrýldik polıtsııa batalonynyń komandıri Azamat Ahmetov. 

Óńir polıtseıderi jol-kólik apatyna jol bermeý úshin ásirese kólik aǵylyp jatqan ýchaskelerde jyldamdyq rejımin saqtaýdy jáne avtomobıldiń tehnıkalyq jaǵdaıyn baqylap otyrý qajettigin eskertti. 

Buǵan deıin Aqtóbede Toyota Alphard júk kóligimen soqtyǵysyp, tórt adam mert bolǵanyn jazǵan edik.