Aqmola oblysynda jol apatynan zardap shekken polıtseı qaıtys boldy
ASTANA. KAZINFORM — Aqmola oblysynda jol apatynan aýyr jaraqat alǵan polıtsııa qyzmetkeri qaıtys boldy. Aqmola oblysy men Astana qalasynyń dárigerleri onyń ómirin saqtap qalýǵa bar kúshin salǵanymen, nátıje bolmady.
Aqmola oblysy polıtsııa departamentiniń baspasóz qyzmeti habarlaǵandaı, 4 qarashada polıtsııa kapıtany Danııar Taev aýrýhanada kóz jumdy. Ol qyzmettik mindetin atqaryp júrgende jol apatyna ushyraǵan.
— Osy oqıǵaǵa baılanysty qylmystyq is qozǵaldy. JAC kóliginiń júrgizýshisi ustalyp, ýaqytsha ustaý ızolıatoryna qamaldy. Tergeý júrip jatyr. Іshki ister mınıstrliginiń basshylyǵy men qyzmetkerleri qaza tapqan polıtseıdiń otbasy men jaqyndaryna kóńil aıtady, — dep habarlady vedomstvo.
Jol apatynan keıin polıtsııa qyzmetkeri Shortandy aýdandyq aýrýhanasyna jetkizilgen. Aqmola oblysy densaýlyq saqtaý basqarmasynyń málimetinshe, onyń jaǵdaıy asa aýyr bolǵan. Er adam komaǵa túsken.
Dárigerler naýqastyń jaǵdaıyn birlesip baǵalap, ony Astanadaǵy № 2 kópbeıindi oblystyq aýrýhanaǵa aýystyrǵan.
— Dárigerler barlyq qajetti reanımatsııalyq sharany júrgizgenimen, naýqastyń ómirin saqtap qala almady. Ol jol apatynan alǵan aýyr jaraqattarynyń saldarynan qaıtys boldy, — dep túsindirdi densaýlyq saqtaý basqarmasy.
Eske salaıyq, buǵan deıin Aqmola oblysyndaǵy tasjolda polıtsııanyń qyzmettik kóligi jol apatyna ushyraǵan edi. JAC T9 kóliginiń júrgizýshisi jyldamdyqty shekten asyryp, qaýipsiz araqashyqtyqty saqtamaı, polıtsııa kóligine soqtyǵysqan. Oqıǵa kezinde polıtsııa qyzmetkerleri arnaıy jol tehnıkasyn súıemeldep, jol qozǵalysynyń qaýipsizdigin qamtamasyz etip júrgen.
