Aqmola oblysynda jol apatynan bir adam qaza taýyp, bes adam aýrýhanaǵa tústi
ASTANA. KAZINFORM — Aqmola oblysynda bolǵan jol apatynan bir adam kóz jumyp, bes jolaýshy, onyń ishinde tórt bala jaraqat aldy. Zardap shekken úsh bala sanıtarııalyq avıatsııa arqyly Kókshetaýǵa jetkizildi.
Aqmola oblystyq polıtsııa departamenti baspasóz qyzmetiniń málimetinshe, 8 qarashada «Astana — Atbasar — Jaqsy» avtojolynyń 329-shaqyrymynda Toyota Camry kóligi qatysqan jol apaty bolǵan. Júrgizýshi rólge ıe bola almaı, kólikti aýdaryp alǵan.
— Jol apaty saldarynan kóliktegi jolaýshylardyń biri oqıǵa ornynda kóz jumdy. Taǵy bes jolaýshy, onyń ishinde kámeletke tolmaǵan tórt bala túrli dene jaraqatymen medıtsınalyq mekemege jetkizildi, — dep habarlady polıtsııadan.
Qazir polıtseıler sotqa deıingi tergeý júrgizip jatyr. Onyń qorytyndysy boıynsha protsestik sheshim qabyldanady. Júrgizýshi ustalyp, ýaqytsha ustaý ızolıatoryna qamaldy.
Aqmola oblysynyń densaýlyq saqtaý basqarmasy 35 jastaǵy áıel men tórt balanyń jaǵdaıyn naqtylady. Bastapqyda olardyń barlyǵy Jaqsy aýdandyq aýrýhanasyna jetkizilgen. Keıin 13 jáne 6 jastaǵy eki ul men 11 jastaǵy qyz sanıtarııalyq avıatsııa arqyly Kókshetaýdaǵy kópbeıindi oblystyq balalar aýrýhanasyna aýystyryldy. Olardyń jaǵdaıy aýyr. 13 jastaǵy bala jansaqtaý bóliminde.
Al áıel men 1 jas 8 aılyq qyz Jaqsy aýdandyq aýrýhanasynda em qabyldap jatyr.
— Eki naýqas ta tolyq tekserýden ótti, qajetti medıtsınalyq kómek alyp jatyr. Jaǵdaılary turaqty, teris dınamıka baıqalmaıdy. Medıtsınalyq kómek qoıylǵan dıagnozdar men naýqastardyń klınıkalyq jaǵdaıyna sáıkes kórsetilip jatyr. Olarǵa táýlik boıy medıtsınalyq baqylaý júrgizilip, jaǵdaıy qadaǵalanyp, taǵaıyndalǵan em qabyldanyp jatyr. 2026 jylǵy 9 qarashadaǵy jaǵdaı boıynsha ahýal Jaqsy aýdandyq aýrýhanasy ákimshiliginiń baqylaýynda, — dep habarlady vedomstvo.
Eske salaıyq, buǵan deıin Aqmola oblysynda jol apatynan zardap shekken polıtseı qaıtys bolǵanyn habarlaǵan edik.
