Aqmola oblysynda joǵalǵan jigittiń denesi jazyq daladan tabyldy

ASTANA. KAZINFORM – Aqmola oblysy Birjan sal aýdanynyń iz-túzsiz joǵalyp ketken 24 jastaǵy turǵynyna qatysty eki aptadan astam ýaqyt izdeý jumystary júrgizildi. Er adamnyń máıiti jazyq daladan tabyldy.

Aqmola oblystyq ІІD baspasóz qyzmetiniń habarlaýynsha, 24 jastaǵy múgedek jigittiń joǵalǵany týraly habar polıtsııaǵa 19 qarasha kúni túsken. Keıin ol 14 qarashada joǵalǵany málim boldy. Osy aralyqta jigittiń týystary ony óz kúshimen tabýǵa tyrysqan. 

Ata-anasynyń aıtýynsha, buǵan deıin balasy kórshi aýyldaǵy týystaryna jaıaýlatyp jıi baryp júrgen. Biraq bul joly týystaryna jete almady. 

«Dereý izdestirý sharalary uıymdastyrylyp, polıtsııa qyzmetkerleri, eriktiler men janashyr azamattardan arnaıy toptar quryldy. Іzdestirý toptary ormandy ári dalaly alqaptardy, jaqyn mańdaǵy eldi mekenderdi aralap shyqty. Aýmaqty keńirek qamtý úshin drondar men qyzmettik kólikter paıdalanyldy», - delingen polıtsııa departamenti málimetinde. 

30 qarashada polıtseıler joǵalǵan adamnyń denesin jazyq daladan tapty. Aldyn ala sebep retinde atalǵan er adam úsip ólýi múmkin ekeni aıtylyp otyr. Naqty sebebi saraptamadan keıin belgili bolady.

Bul turǵyda polıtseıler qys mezgilinde jazataıym oqıǵalar men úsik shalýǵa jol bermes úshin habar-osharsyz ketken adamdardy izdestirýge qatysty alǵashqy kúni habarlaýǵa shaqyrdy. 

Buǵan deıin Almatyda joǵalyp ketken qyzdyń denesi tabylǵanyn jazǵan edik.