Aqmola oblysynda jyl basynan beri 30-dan astam jumysshy óndiristik jaraqat alǵan
KÓKShETAÝ. KAZINFORM — Aqmola oblysyndaǵy eńbek ınspektsııasy óńirdegi óndiristik jazataıym oqıǵalardyń negizgi sebepterin atady, dep habarlaıdy Kazinform agenttiginiń tilshisi.
2025 jyldyń 1 tamyzyna deıingi derekterge sáıkes, Aqmola oblysynda jyl basynan beri óndiriste 24 jazataıym oqıǵa tirkelgen, onyń ishinde 3 toptyq jaǵdaı bolǵan. Jalpy 31 adam zardap shekti, olardyń úsheýi qaza tapty.
— Barlyq jazataıym oqıǵalar boıynsha arnaıy tergeý júrgizilip, aktiler toltyryldy, jumys berýshiler men jumysshylardyń kiná úlesi anyqtaldy. Barlyq materıaldar protsessýaldyq sheshim qabyldaý úshin ishki ister organdaryna joldandy, — dedi Aqmola oblysy boıynsha memlekettik eńbek ınspektsııasy departamenti basshysynyń orynbasary Ýaqyt Beısembaev.
Onyń aıtýynsha, jazataıym oqıǵalardyń negizgi sebepteri mynalar:
• zardap shekkenderdiń abaısyzdyǵy,
• eńbek qaýipsizdigi jáne eńbekti qorǵaý erejeleriniń buzylýy,
• óndiristiń durys uıymdastyrylmaýy,
• qaýipsiz eńbek tásilderine jetkiliksiz úıretý,
• jol qozǵalysy erejelerin buzý,
• jeke qorǵanys quraldarynyń bolmaýy nemese olardy paıdalanbaý.
Sonymen qatar, qazirgi ýaqytta oblystaǵy 222 kásiporynda halyqaralyq jáne ulttyq eńbekti qorǵaý standarttary engizilgen, al 912 mekemede óndiristik keńester jumys isteıdi. Bul keńesterde 1 020 tehnıkalyq ınspektor eńbek etip júr.
Buǵan deıin óndiristik jaraqat alǵan jaǵdaıda ne isteý kerektigi jaıly habarlanǵan bolatyn.
Al Qazaqstanda sońǵy 5 jylda óndiristik jaraqattaný deńgeıi 6,3 paıyzǵa tómendedi.