Aqmola oblysynda jerasty esirtki zerthanasyn uıymdastyrǵandar sottaldy

KÓKShETAÝ. KAZINFORM – Aqmola oblysynda sıntetıkalyq esirtki daıyndaýǵa arnalǵan jasyryn zerthana uıymdastyrǵan eki er adamǵa sot úkimi shyqty. Olar tehnologııany zerttep, qajetti jabdyqtar men reaktıvterdi satyp alyp úlgergenimen, polıtsııa qyzmetkerleri tarapynan der kezinde ustaldy.

Oblystyq polıtsııa departamentiniń málimetinshe, qylmystyq istiń uıymdastyrýshylary – eki er adamǵa mamandandyrylǵan aýdanaralyq qylmystyq ister jónindegi sotta úkim jarııalandy.

Іs materıaldaryna sáıkes, 2024 jyldyń kókteminde Astana turǵyny tórt bóshke prekýrsor satyp alyp, oblys aýmaǵynda psıhotroptyq zattardy zańsyz óndirýdi josparlaǵan. Keıin ol bul iske tanysyn da tartqan.

«Ótken jyldyń kúzinde kúdiktiler psıhotroptyq zattardy sıntezdeý ádisterin belsendi zerttep, tehnologııalyq shemalar tańdaǵan. Qajetti jabdyqty ınternet-dúkender men marketpleıster arqyly tapsyrys bergen. Zerthanany Astanadaǵy óziniń úıiniń jertólesine ornalastyrýdy josparlaǵan. 2025 jylǵy aqpannan mamyrǵa deıin reaktıvter, reaktsııalyq ydystar, tońazytqysh jabdyq jáne ózge de qural-jabdyq satyp alyp, mamyr aıynda óndiristi iske qosýdy kózdegen», – dep habarlady vedomstvo.

Alaıda olardyń jospary júzege aspady. 27 mamyr kúni Astanada jerasty zerthanasy anyqtalyp, uıymdastyrýshylar ustaldy.

«Tergeý barysynda ekinshi er adamnyń Tselınograd aýdanynyń Talapker aýylynda osyndaı fıtozerthana uıymdastyrǵany belgili boldy. Arnaıy daıyndalǵan orynda ol jabdyq ornatyp, kannabıs tuqymyn ákelip, esirtki quramdas ósimdikterdi ósirýdi josparlaǵan», – dep qosty sottan.

Birneshe aıǵa sozylǵan tergeý barysynda oryn alǵan barlyq mán-jaı anyqtalyp, qajetti dálelder jınaldy.

Sot úkimi boıynsha, kúdiktilerdiń biri 5 jyl 7 aıǵa, ekinshisi 7 jyl 6 aıǵa bas bostandyǵynan aıyryldy. Ekeýi de jazasyn ortasha qaýipsizdik deńgeıindegi qylmystyq-atqarý júıesi mekemesinde óteıtin bolady.

Buǵan deıin bank shotyn esirtki satýshylarǵa ádeıi bergen adamdarǵa qylmystyq is qozǵalǵany habarlandy.