Aqmola oblysynda jer konkýrsyna baılanysty qabyldanǵan qaýlynyń kúshi joıyldy

ASTANA. KAZINFORM – Joǵarǵy Sot málimetinshe, Aqmola oblysynda sharýa qojalyǵynyń basshysy aýyldyq okrýg aýmaǵyndaǵy jer telimine qatysty konkýrs qorytyndysymen kelispeı, sotqa júgingen. Apellıatsııalyq ınstantsııa birinshi satydaǵy sot sheshimin joıyp, konkýrs zań buzýshylyqtarmen ótkizilgenin anyqtady.

2024 jyly sharýashylyq basshysy Jalmanqulaq aýyldyq okrýginde ornalasqan jer ýchaskesine 10 jyl merzimge jer paıdalaný quqyǵyn berý jónindegi konkýrsqa qatysqan. Alaıda konkýrsta jeńilip qalyp, jer komıssııasynyń sheshimi men Egindikól aýdany ákiminiń qaýlysyna shaǵym túsirgen.

Birinshi satydaǵy sot talapty qanaǵattandyrýdan bas tartqanymen, apellıatsııalyq sot isti qarap, birqatar zań buzýshylyqtardy anyqtady.

Sot málimetinshe, jer komıssııasy konkýrsqa qatysqan alty úmitkerge ınvestıtsııa kólemi úshin 20 upaı jáne osy aýmaqta keminde bes jyl turǵany úshin qosymsha 10 upaı bergen. Konkýrs jeńimpazy shynymen de jer telimi ornalasqan aýyldyq okrýgtiń turǵyny bolǵan.

Alaıda qalǵan qatysýshylar, sonyń ishinde talap qoıýshy – aýdan ortalyǵynda turǵan. Soǵan qaramastan, komıssııa bul úmitkerlerge de zańsyz túrde 10 upaı bergen. Bul jaǵdaı konkýrs nátıjesine tikeleı áser etip, jerdi berý týraly zańsyz qaýly qabyldanýyna sebep bolǵan.

Sondaı-aq sot komıssııa otyrysynyń sebepsiz keıinge qaldyrylǵanyn atap ótti. Habarlandyrýǵa sáıkes, konkýrs 2024 jylǵy 16 qazanda ótýi tıis edi. Alaıda komıssııa otyrysy bir aptaǵa shegerilip, bul jóninde resmı qujattar men beınejazba usynylmaǵan. Buǵan qosa, aýyl sharýashylyǵy, jer qatynastary jáne kásipkerlik bóliminiń komıssııa quramy boıynsha usynǵan derekteri ózara qaıshy bolǵan.

- Komıssııa otyrysynyń hattamasy men beınejazbasynyń bolmaýy jer konkýrs rásimderiniń tıisti deńgeıde uıymdastyrylmaǵanyn kórsetip, qabyldanǵan sheshimderdiń zańsyzdyǵyn aıǵaqtaıdy.

Osyǵan baılanysty Aqmola oblystyq soty mamandandyrylǵan aýdanaralyq ákimshilik sottyń sheshiminiń, jer komıssııasynyń hattamalyq sheshiminiń jáne aýdan ákiminiń qaýlysynyń kúshin joıdy, - delingen aqparatta.

Sonymen qatar, jol berilgen zań buzýshylyqtar boıynsha sot oblys ákiminiń atyna kináli tulǵalarǵa shara qoldaný maqsatynda jeke uıǵarym shyǵardy.

Qaýly zańdy kúshine engen joq.

Aıta keteıik, Aqmola oblysynyń dıqandary kúzdik bıdaı orýdy bastady.