Aqmola oblysynda JEO-ny jóndep jatqan bir jumysshy qaıtys bolyp, úsheýi jaraqat aldy

ASTANA. KAZINFORM – Oqıǵanyń sebebi men mán- jaıyn anyqtaý úshin Aqmola oblysy Memlekettik eńbek ınspektsııasy komıteti departamenti arnaıy tergeý júrgizý úshin komıssııa qurdy.

Aqmola oblysy Memlekettik eńbek ınspektsııasy komıteti departamentinen habarlaǵandaı, jazataıym oqıǵa 26 tamyzda, merdiger uıymnyń qyzmetkerleri Stepnogorsk JEO-daǵy № 2 qazandyq agregatynda sý ekonomaızerin jóndep jatqanda bolǵan.

– Zardap shekkender Stepnogorsk qalasynyń kópsalaly aýrýhanasyna jetkizildi. Olardyń bireýi qaıtys boldy, úsheýi ártúrli dáreje jaraqat aldy. Qazir patsıentterdiń jaǵdaıy turaqty, olardyń ómirine qaýip tónip turǵan joq, emdeýdiń tolyq kólemin alady, - dedi vedomstvodan.

Oqıǵanyń sebebi men mán-jaıyn anyqtaý úshin memlekettik eńbek ınspektsııasy komıteti departamenti tergeý júrgizý úshin arnaıy komıssııa qurdy. Tergeý aıaqtalǵannan keıin materıaldar protsestik sheshim qabyldaý úshin quqyq qorǵaý organdaryna beriletin bolady.

Sonymen qatar Aqmola oblysy Polıtsııa departamentiniń baspasóz qyzmetinen habarlaǵandaı, osy jazataıym oqıǵa faktisi boıynsha qylmystyq is qozǵalǵan.

– Qazir tergeý organdary oqıǵanyń barlyq mán-jaıyn jáne tragedııaǵa alyp kelgen sebepterdi anyqtaýǵa baǵyttalǵan tergeý júrgizip jatyr. Tekserý qorytyndysy boıynsha laýazymdy tulǵalardyń is - áreketterine quqyqtyq baǵa berilip, túpkilikti sheshim qabyldanady, - dep tolyqtyrdy polıtsııa.

Buǵan deıin Rýdnyıda sý qubyryn jóndeý kezinde eki jumysshy jaraqat alǵanyn jazǵan edik.