Aqmola oblysynda jaıly mektepterdiń jaǵdaıyna kim jaýap beredi

ASTANA. KAZINFORM - Aqmola oblysynda «Jaıly mektep» ulttyq jobasy aıasyndaǵy qurylys jumystary tolyq aıaqtaldy. Alaıda qazir óńirde bul oqý oryndaryn kútip-ustaý máselesi sheshilmeı otyr. 

Aıta keteıik, atalǵan mektepterdi Memleket basshysy Ulttyq quryltaıdyń IV otyrysynda joǵary baǵalaǵan bolatyn.

Ulttyq joba aıasynda Aqmola oblysynda 12 200 orynǵa arnalǵan toǵyz mektep ýaqytynda salynyp bitti. Qaraótkel, Qarajar, Qabanbaı batyr, Qoıandy, Aqmol aýyldarynda bir-birden jáne Talapker aýyly men Kókshetaý qalasynda eki mektepten ashyldy.

Alaıda oblystyq máslıhattyń turaqty komıssııasy otyrysynda aıtylǵandaı, bul mektepterdi kútip-ustaý máselesi áli kúnge deıin sheshilgen joq.

Bastapqyda qarjylandyrý respýblıkalyq bıýdjet esebinen júzege asýy tıis edi. Alaıda qarajat bólinbegendikten, qazirgi tańda mektepterdiń kútimi oblystyq bıýdjetke júktelip otyr.

Redaktsııanyń resmı saýalyna jaýap bergen Aqmola oblysy bilim basqarmasynyń ókilderi 2025 jyly mektepterdi kútip-ustaýǵa oblystyq bıýdjet komıssııasy qarajatty qaıta bólý arqyly 1 mlrd teńge bólinetin bolyp sheshilgen.

— Budan bólek, osy toqsanda mektepterdi kútip-ustaýǵa qosymsha qajettilik bıýdjet naqtylanǵanda qaralady, — dep tolyqtyrdy vedomstvo.

Eske sala keteıik, «Jaıly mektep» ulttyq jobasy oqýshy oryndarynyń tapshylyǵyn, apatty mektepterdi jáne úsh aýysymdy oqytýdy joıýǵa baǵyttalǵan. Prezıdenttiń jýyrdaǵy jumys sapary barysynda Aqmola oblysy osy joba aıasynda josparlanǵan barlyq mektepti birinshi bolyp paıdalanýǵa bergen óńir retinde atap ótildi.

Osyǵan deıin Aqmola oblysynda qaıtarylǵan aktıvter esebinen ambýlatorııa salynyp jatqany týraly jazdyq.