Aqmola oblysynda «Jaıly mektep» jobasy qalaı júzege asyrylyp jatyr
KÓKShETAÝ. KAZINFORM – Aqmola oblysynyń Tselınograd aýdanynda «Jaıly mektep» ulttyq jobasy sheńberinde 10 myń oqýshyǵa arnalǵan 7 bilim oshaǵy salynyp jatyr.
Aqmola oblysy ákimdigi baspasóz qyzmetiniń málimetinshe, bul bilim ǵımarattary sońǵy úlgi boıynsha jabdyqtalady. ıAǵnı, mektepterde zamanaýı qural-jabdyqtar men jıhazdar, jaıly kabınetter jáne sport zaldar bolady. Sondaı-aq, jaýapty merdiger uıymdar bilim oshaqtarynyń aýlasyn abattandyrmaq.
Talapker jáne Qaraótkel aýyldaryndaǵy mektepterge «KGS Saýda» JShS jaýapty. Qazirgi ýaqytta bilim oshaqtarynyń aýmaǵy abattandyrylyp, tehnologııalyq jabdyqtardy ornatý jumystary júrgizilip jatyr.
Al, Aqmol aýylyndaǵy mektepti «ÝK Stroı» JShS salyp jatyr. Bilim oshaǵyna zamanaýı qural-jabdyqtar satyp alynyp, ishki árleý jumystary aıaqtaldy. Qazirgi tańda aýmaǵyn abattandyrý jumystary bastalyp ketti. Al, Qoıandy aýylyndaǵy bilim oshaǵynyń qurylysyn «BI GLobal» JShS qolǵa alǵan. Búgingi tańda qasbet jumystary aıaqtalyp, ınjenerlik jeliler tartyldy.
Memleket basshysynyń tikeleı tapsyrmasy aıasynda salynyp jatqan mektepterdiń qurylysy jumystarynyń barysymen Aqmola oblysynyń ákimi Marat Ahmetjanov tanysty.
Oblys basshysy «Jaıly mektep» ulttyq jobasyna erekshe kóńil aýdaryp, onyń mańyzdylyǵyn atap ótti.
«Memleket basshysy bilim salasyna erekshe kóńil bólip otyr. «Jaıly mektep» jobasy asıaynda bóı kóterip jatqan bilim oshaqtary talapqa saı ári balalar úshin qaýipsiz, qoljetimdi bolýy kerek. Bilim sapasy da talapqa saı bolýy tıis. Eń bastysy, salynyp jatqan nysandar sapaly bolýy kerek», - dedi oblys ákimi.
Sonymen birge, Marat Ahmetjanov jaýapty merdigerlermen jáne memlekettik organdarmen keńes ótkizip, ulttyq jobany júzege asyrýdaǵy negizgi máselelerdi, sondaı-aq daıyn ǵımarattardy qabyldaý aspektilerin talqylady.
«Jańa oqý jylynyń basynda «Jaıly mektep» jobasy aıasynda salynǵan 4 mektepti ashýdy josparlap otyrmyz. Qurylys jumystarynan bólek kadr máselesine de nazar aýdarý qajet. Prezıdent Qasym-Jomart Toqaev aıtyp ótkendeı, oqytý ádisteri jańashyl jáne ár balada jeke kózqaras bolý kerek. Bilim basqarmasy jańadan ashylatyn mektepterdiń oqý úderisin uıymdastyrýdy qamtamasyz etip, pedagogıkalyq jáne basqa da qajetti kadrlardy daıyndaýy tıis. Sondaı-aq, oqýshylar sanyn toltyrý da mańyzdy. Sonymen qatar, tamaqtandyrý, lıtsenzııalyq kúzet, qaýipsizdik tehnıkasyna erekshe kóńil bólip, sheshý qajet. Bilim oshaqtaryndaǵy qalǵan qajetti jumystardy tezdetýdi tapsyramyn», - dep túıindedi aımaq basshysy.
Aıta keteıik, 2025 jyly óńirde «Jaıly mektep» ulttyq jobasy aıasynda 11 myńǵa jýyq orynǵa arnalǵan taǵy 9 bilim oshaǵy salynatyn bolady. Búgingi tańda osy baǵytta 30 gektardy quraıtyn jer telimderi bólinip otyr.
Eske salaıyq, budan buryn Aqmola oblysynda 264 mektep Starlink ınternetine qosylǵanyn jazǵan edik.
