Aqmola oblysynda jasóspirimder arasynda erkin kúresten halyqaralyq týrnır ótip jatyr
ASTANA. KAZINFORM — Aqmola oblysynyń Esil qalasynda sport sheberi, erkin kúresten Qazaqstannyń eńbek sińirgen jattyqtyrýshysy Tólegen Ysqaqov pen sport sheberi, Qazaqstan chempıony Mádı Ysqaqovty eske alýǵa arnalǵan jasóspirimder arasynda halyqaralyq týrnır ótip jatyr. Boz kilemde beldesetin jas sportshylar Esil aýdany ákiminiń arnaıy júldesine talasady.
Jarysqa Qazaqstan, Qyrǵyzstan, Tájikstan jáne Reseıden 270 sportshy qatysyp jatyr. Palýandar 22 salmaq dárejesi boıynsha úzdikter ataǵyn sarapqa salady.
— Bul týrnır — salaýatty ómir saltyn nasıhattaýdy maqsat etedi. Palýandar sporttyq sheberlikterin shyńdap, jaqsy nátıje kórsetip jatyr. Bul da ár óńirden kelgen komanda múshelerin biriktiredi», — deıdi týrnırdiń bas tóreshisi Qobylandy Shákirov.
Ol týrnırdiń fınalısteri júldeden bólek, sport sheberine kandıdat ataǵyn alǵanyn aıtty.
Jarysqa qatysyp jatqan palýandar, jattyqtyrýshylar sondaı-aq tóreshiler de jatyn oryn, tamaqpen qamtamasyz etilgen. Zalda medıtsına qyzmetkerleri kezekshilik atqaryp otyr. Týrnır qalanyń sý jańa dene shynyqtyrý ortalyǵynda ótip jatyr.
Týrnırdi uıymdastyrýshy Esil aýdandyq Erkin kúres federatsııasynyń prezıdenti Talǵat Áljanov jarystyń 20-shy ret ótkizilip otyrǵanyn aıtty. Týrnır jyl saıynǵy jáne dástúrli sharaǵa aınaldy, oǵan ártúrli elderden sportshylar únemi keledi.
Týrnırge qatysýshylardyń qatarynda jyldar boıy jekpe-jekten bıik belesterdi baǵyndyrǵan sportshylar da bar.
— Osy týrnırdi qarjylandyrýǵa jumsalǵan qarajattyń 90% jergilikti kásipkerlerdiń qaltasynan shyqty. Esil aýdanynyń ákimdigi de qalys qalmady, avtobýstar uıymdastyryp, sportshylardy ornalastyrdy, — dedi Talǵat Áljanov.
Ol týrnırdiń aldynda eki apta boıy daıarlyq jıyndary ótkenin aıtty.
Talǵat Áljanov jergilikti sportshylarǵa jattyǵatyn ári iri týrnır ótkizý úshin bólek kúres bólmesiniń jetispeıtinin aıtty. Qalada ondaı zaldyń jaqyn arada salynatynyna senim bildirdi.
Tájikstannan kelgen komanda bapkeri Mardalı Shakýrov ózimen birge toǵyz oıynshysy kelgenin aıtty. Buǵan deıin týrnırge Tájikstannan 16-17 jigit kelse, bıyl olardyń sany az, sebebi komandanyń ózge músheleri ıAkýtııada (Reseı) ótetin jarysqa ketken.
— Sportshylarym osynda baq synaıdy, úıge barǵannan keıin qatelikterimizben jumys isteımiz. Kim jeńetnin boz kilem kórsete jatar, — deıdi Mardalı Shákýrov.
Ol qatysýshylardyń joǵary daıyndyqpen kelgenin aıtyp, uıymdastyrýshylarǵa alǵysyn bildirdi.
Ózbekstannan kelgen komanda bapkeri Mýrodjon Ashýrov ózimen birge alty palýandy ákelgen. Boljamy boıynsha onyń ekeýi fınalǵa shyǵýy tıis.
— Bul týrnır bizge tájirıbe beredi. Bizdiń jigitter bolashaqta Azııa chempıonatynda baq synaıtyn qazaqstandyq sportshylarmen dostasady», — dep bólisti jattyqtyrýshy.
Jasóspirimder arasyndaǵy týrnır Esil qalasynda 29-30 kúnderi ótip jatyr.
