Aqmola oblysynda jasóspirimdi poıyz ústinde toq soqty
ASTANA. KAZINFORM — Aqmola oblysynyń Shortandy aýdanynda poıyz vagonyna shyqqan jasóspirimdi toq soǵyp, denesiniń 70 paıyzy kúıip qaldy. Oqıǵaǵa baılanysty qylmystyq is qozǵaldy.
Qaıǵyly oqıǵa 29 qazanda Shortandy aýdanyndaǵy temirjol stantsııasynda bolǵan. Serýendep júrgen eki jasóspirimniń biri poıyz vagonyna shyqpaq bolǵan kezde ony toq soqqan.
Kóliktegi polıtsııa departamentiniń baspasóz qyzmeti atalǵan derek boıynsha qylmystyq is qozǵalǵanyn habarlady.
— Qazir qajetti tergeý amaldary júrgizilip jatyr. Oqıǵanyń mán-jaıy men sebepteri anyqtalýda. Jasóspirimderdiń biri Shortandy aýdandyq aýrýhanasyna jatqyzyldy. Ekinshisi úıine ózi oralǵan, — dep málimdedi vedomstvo.
Aqmola oblysynyń densaýlyq saqtaý basqarmasynyń málimetinshe, Shortandy aýdandyq aýrýhanasyna denesiniń 70 paıyzy kúıgen, elektr jaraqatyn alǵan jáne úshinshi dárejeli kúıiktik shokqa ushyraǵan 15 jastaǵy jasóspirim jetkizilgen.
— Ol shuǵyl túrde qarqyndy terapııa palatasyna jatqyzyldy. Balalar reanımatology E.Jumaǵalıevtiń qatysýymen konsýltatsııa ótkizildi. Odan ári emdeý taktıkasyn anyqtaý jáne naýqasty tasymaldaý máselesin sheshý úshin sanıtarııalyq avıatsııa jelisi arqyly balalar reanımatology shaqyryldy. Dárigerler konsılıýmynan keıin balanyń jaǵdaıy turaqtalǵanǵa deıin aýrýhanada baqylaýda qaldyrý týraly sheshim qabyldandy, — dep tolyqtyrdy basqarma.
Kóliktegi polıtsııa poıyz toqtap tursa da, onyń vagonyna shyǵýǵa jáne poıyzdyń astynan ótýge qatań tyıym salynatynyn taǵy da eskertti.
Buǵan deıin Qostanaı qalasyndaǵy temirjol aýmaǵynda jasóspirimdi toq soqqan bolatyn.
