Aqmola oblysynda janýarlardyń adamǵa shabýyly jıilep barady

KÓKShETAÝ. KAZINFORM — 2026 jyldyń qańtar aıynyń basynan beri oblysta janýarlardyń adamǵa shabýyldaǵan 44 jaǵdaıy tirkeldi.

Aqmola oblysynyń bas memlekettik sanıtarlyq dárigeri Serik Omarhanov epıdemıologııalyq jaǵdaıǵa qatysty pikir bildirdi.

Aqmola oblysy boıynsha memlekettik saraptama departamentiniń málimetinshe, byltyr 12 aıda janýarlardyń adamdy tisteýi boıynsha shaǵymdary 2024 jyldyń sáıkes kezeńimen salystyrǵanda 544 jaǵdaıǵa nemese 21,9% ósken. Jyl boıy 2481 adam medıtsınalyq kómekke júgingen.

— Ótinishterdiń basym bóligi Kókshetaý qalasyna tıesili — jalpy sannyń 24,1%. Máselen, 2025 jyldyń 12 aıynda Kókshetaýda 600 shaqyrý tirkelse, onyń 194-i (32,3%) balalar men jasóspirimderden bolǵan, — dedi Serik Omarhanov.

Ótinish bildirgenderdiń ishinen 2481 adam vaktsınatsııalaýǵa taǵaıyndaldy, 2472 adam (99,6%) ekpe aldy, onyń ishinde 1639 adamǵa (66,3%) antırabııalyq vaktsına salynsa, ımmýnoglobýlın jáne antırabııalyq ekpe 833 turǵynǵa (33,7%) egildi.

Bul rette 963 ótinish bildirýshi — aýyl turǵyndary. 2025 jyly ótinish bergenderdiń eń kóp paıyzy 6-14 jas aralyǵyndaǵylar boldy — 673 (27,1%).

2026 jyldyń qańtar aıynyń basynan beri oblysta adamdy tisteýdiń 44 deregi tirkelgen.

— Olardyń 59%-yn ıt qapqan, 38,6%-yn mysyq tyrnap, tistegen. Shaqyrýlardyń basym bóligi Kókshetaý qalasynan — 12 jaǵdaı (27,2%). Onyń tórteýi balalar men jasóspirimder arasynda, segizi eresekter arasynda tirkeldi, — dep qosty oblystyń bas sanıtarlyq dárigeri.

Kómek suraǵandardyń eń kóbi 46 jastan asqan adamdar arasynda tirkeldi. Bul boıynsha 14 derek bolsa, 6-14 jas aralyǵyndaǵy balalar arasynda 12 jaǵdaı anyqtaldy. 18-25 jas aralyǵyndaǵy jastar arasynda 5 jaǵdaı, 36-40 jastaǵylar — 4, bes jasqa deıingiler arasynda úsh jaǵdaı tirkelse, 15-17 jas aralyǵynda — eki, 26-30 jasta — eki, 31-35 jas aralyǵynda — bir, 41-45 jas aralyǵyndaǵy bir adam kómek aldy.

Aıta keteıik, ShQO-da túz taǵylaryn qutyrýǵa qarsy vaktsınalaý jumystary júrgizilip jatyr.