Aqmola oblysynda jańbyr sýy avtokólik jolyn shaıyp ketti
KÓKShETAÝ. KAZINFORM — Býrabaı aýdanynda jańbyr sýy Qarajar aýylyna baratyn avtokólik jolyn shaıyp ketti.
Topan sýdyń avtokólik jolyn shaıyp ketkendigi týraly vıdeo áleýmettik jelide jarııalandy.
Osyǵan baılanysty Atameken aýyldyq okrýginiń ákimdiginen túsinik berdi.
«Nóser jańbyr men egistikterden aǵyp kelgen sýdan Qaıraqty ózenindegi sýdyń deńgeıi kóterildi. Sonyń saldarynan Qarajar aýylyna kireberis avtojol ýchaskesinde jol tósemin sý shaıyp ketti», — dedi ákimdikten.
Vedomstvodan atap ótkendeı, Qarajar aýylyna balama jol bar. Turǵyn úılerdi sý basý qaýpi joq.
«Sý qaıtqan soń sý ótkizý nysandaryn ornatý jumystary qolǵa alynady», - dep tolyqtyrdy vedomstvodan.
Alaıda, aýyl turǵyndarynyń aıtýynsha, atalmysh avtokólik jolyn osymen úshinshi ret sý shaıyp ketken. Ákimdiktegiler aıtyp otyrǵan balama jol bolǵanymen júrýge jaramsyz kórinedi.
Aıta ketsek, budan buryn tasqyn sýdan zardap shekken Atbasar aýdany men Kókshetaý turǵyndary baspanaly bolǵanyn jazǵan edik.
