Aqmola oblysynda jalǵan qujatpen júrgen júrgizýshi ustaldy

Aqmola oblysynda patrýldik polıtsııa qyzmetkerleri qazaqstandyq azamatty Qyrǵyz Respýblıkasynyń atyna jasalǵan jalǵan qujattarmen ustady, dep habarlaıdy Polisia.kz.

Qazaqstandyq azamat kólik basqarý quqyǵynan aıyrylǵandyqtan, zańdy aınalyp ótip, kólikti esh kedergisiz júrgizý maqsatynda osyndaı aılaǵa barǵan.

17 qazan kúni elordaǵa qarasty patrýldik polıtsııa rotasynyń qyzmetkerleri Astana – Qorǵaljyn avtojolynda Mercedes-Benz avtokóligin toqtatty. Tekserý barysynda júrgizýshi ózin Qyrǵyz Respýblıkasynyń azamaty dep tanystyryp, polıtsııaǵa jeke kýálik pen júrgizýshi kýáligin usyndy.

Alaıda, tekseris nátıjesinde qujattardyń jalǵan ekeni anyqtaldy. Patrýldik polıtsııa qyzmetkerleri onyń Qazaqstan aýmaǵynda bolý maqsatyna jáne memlekettik shekarany kesip ótýine baılanysty qosymsha suraqtar qoıyp, kóshi-qon qyzmetiniń málimetter bazasynan muqııat tekserý júrgizdi.

Nátıjesinde osyndaı aty-jóndegi sheteldik azamattyń Qazaqstan shekarasyn múlde kesip ótpegeni belgili boldy. Osy jaǵdaıdan keıin júrgizýshi Tselınograd aýdanynyń polıtsııa bólimine jetkizildi.

Aıta keterligi bul azamat bıylǵy aqpan aıynda Ekibastuz qalasynda mas kúıinde kólik basqarǵany úshin ustalǵan. Ekibastuz qalalyq sotynyń sheshimimen ol ákimshilik qamaýǵa alynyp, 7 jylǵa kólik júrgizý quqyǵynan aıyrylǵan bolatyn.

Alaıda zańdy aınalyp ótý maqsatynda, ol Qyrǵyz Respýblıkasynyń atyna jasalǵan jalǵan júrgizýshi kýáligin paıdalanýǵa tyrysqan. Qazirgi tańda polıtsııa qyzmetkerleri júrgizýshige qatysty ákimshilik hattama toltyryp, kóligin aıyp turaǵyna japty.

Sonymen qatar, jalǵan qujattardyń qaı jerde jáne qandaı jaǵdaıda jasalǵanyn anyqtaý jumystary jalǵasýda.