Aqmola oblysynda jalǵan qujat jasamaq bolǵan kúdikti ustaldy
ASTANA.KAZINFORM — Aqmola oblysynda merzimdi áskerı qyzmetten jaltarýǵa kómektesýge ýáde etken medıtsına qyzmetkerine qatysty úsh birdeı qylmystyq is tergelip jatyr, dep habarlaıdy Rolisia.kz.
17 naýryzda oblystyń aýdandarynyń biriniń polıtsııa bólimine azamattardan qatarynan úsh aryz túsken. Olardyń aıtýynsha, ótken jyldyń sońynda ózin medıtsınalyq qyzmetker retinde tanystyrǵan belgisiz azamat áskerge shaqyrýdan bosatý úshin «qajetti» dıagnoz qoıyp berýge ýáde etken.
Kúdikti óz «qyzmeti» úshin jábirlenýshilerden jalpy somasy 1 mln 200 myń teńgeden astam qarajat alǵan. Alaıda aqsha berilgennen keıin azamattar ýáde etilgen medıtsınalyq qujattardy da, qarajatty da ala almaǵan. Osydan keıin olar quqyq qorǵaý organdaryna júgingen.
Jedel-izdestirý is-sharalary barysynda polıtsııa qyzmetkerleri kúdiktiniń jeke basyn anyqtady. Ol jergilikti medıtsınalyq pýnktterdiń birinde jumys isteıtini belgili boldy. Qazirgi ýaqytta atalǵan úsh derek boıynsha sotqa deıingi tergeý júrgizilip, onyń basqa da uqsas qylmystarǵa qatysy bar-joǵy tekserilip jatyr.
Sonymen qatar tergeý barysynda aryzdanýshylardyń áreketterine de quqyqtyq baǵa beriletin bolady. Sebebi áskerı qyzmetten zańsyz jaltarý áreketi de zań aldynda jaýapkershilikke ákelýi múmkin.
— Quqyq qorǵaý organdary azamattarǵa aqshalaı syıaqy úshin áskerı qyzmetke qatysty kez kelgen «máseleni sheshý» usynystary zańsyz ekenin eskertedi. Kóp jaǵdaıda mundaı ýádelerdiń artynda alaıaqtyq shemalar jasyrylady. Sondaı-aq sybaılas jemqorlyq sıpatyndaǵy áreketterge qatysý, tipti «klıent» retinde de, ákimshilik nemese qylmystyq jaýapkershilikke soqtyratynyn este ustaý mańyzdy. Polıtsııa azamattardy qyraǵy bolýǵa jáne osyndaı faktiler týraly dereý quqyq qorǵaý organdaryna habarlaýǵa shaqyrady, — delingen aqparatta.
Eske salaıyq, osyǵan deıin Aqmola oblysynda 80 adamdy «shetelde jumysqa ornalastyramyn» dep aldaǵan kúdikti qamaýǵa alynǵany týraly jazdyq.
